Cov neeg thoj nam Mias Mas nyob Thaib teb nyob tos UN txoj kev pab

Lub Leej Haum Kuj (UN) thov kom tseem hwv Thaib tso lus kheev rau UN cov neeg mus pab cov neeg thoj nam Mias Mas uas khiav los nyob Thaib teb, vim kev sib ntaus sib tua.

Muaj tsoom pej xeem Mias Mas 4,000 tawm leej khiav ntawm lub xeev Karen hla ciam teb mus rau Thaib teb. Yog vim lub lis piam tag los cov tub rog Mias Mas thiab cov tub rog Karen tau sib tua hnyav, ces ua rau tsoom pej xeem thiaj khiav hla ciam teb mus rau Thaib teb. Cov neeg Mias Mas khiav nkag Thaib teb ncaj ntawm lub xeev TAK uas nyob Thaib teb sab hnub poob. Cov nom Thaib nyob hauv TAK hais tias : lawv tau pab cov neeg thoj nam Mias Mas li ntawm 3,500 leej nyob hauv qho chaw, nyob Thaib teb. UN tau txhawj xeeb txog kev nyob thaj yeeb ntawm cov neeg thoj nam, UN thiaj tau thov cov tseem hwv Thaib thiab xa kev pab ntawm UNHCR thiab NGOS mus pab cov neeg thoj nam raws tib neeg kev ncaj ncees thiab pov hwm lawv. Cov neeg thoj nam feem coob ntshai rov mus Mias Mas teb, thiab lawv xav thov nyob Thaib teb ntxiv mus.