Cov nkawm niam txiv Hmoob koom rooj sau siab cov txij nkawm lis dej num txhawb lub cuab 2022

Cov txij nkawm haiv neeg Hmoob nrog Txiv Plig Phus tus thawj tswj fab cuab yim neeg hauv Rooj Txiv Tswv Qhia nyob Thaib teb, thau duab ua ke nyob hauv lub rooj sau siab cov txij nkawm lis dej num txhawb lub cuab 2022

Thursday, December 01, 2022

Nyob hauv hnub tim 25 – 27 lub 11 hlis 2022 Rooj Txiv Tswv Qhia nyob Thaib teb fab tswj lub cuab yim neeg caw cov txij nkawm ua hauj lwm txhawb lub cuab hauv 11 lub Cheeb Koom Txoos nyob Thaib teb tuaj sau siab ua ke nyob rau hauv lub nroog Phas Thas Yas (Pattaya, Chunburi), muaj cov haiv neeg Hmoob tuaj koom li 50 leej ntawm tag nrho kwv yees li 300 leej.

Lub rooj sau siab ib xyoos tsa muaj ib zaug, tab sis txij thaum muaj tus kab mob COVID-19 sib kis thoob lub teb chaws thiaj muab ncua los txog tav no, thiab Rooj Txiv Tswv Qhia muab hloov tshiab cia 3 xyoos mam tsa lub rooj sai siab ib zaug. Xyoo no yog Cheeb Koom Txoos Chaas Thas Npus Lis (Chanthaburi) ua tswv cuab. Lub rooj sau siab zaum no lub hom phiaj yog ua mus raws Vaj Qhia lo lus tau hais tseg nyob hauv ‘Hnub sau siab cuab yim neeg thoob qab ntuj zaum tim 10’ tias ‘KEV SIB HLUB HAUV LUB CUAB YOG TSWV NTUJ HU THIAB TXOJ KEV COJ MUS CUAG QHOV NTSHIAB’ (FAMILY LOVE: A VOCATION AND A PART TO HOLINESS).

Hais txog cov zaj sau siab nyob hauv 3 hnub ntawd muaj li no: hnub ib hais txog ‘kev sib hlub hauv lub cuab’, hnub ob hais txog ‘kev sib hlub hauv lub cuab yog Tswv Ntuj hu’, ‘kev sib hlub hauv lub cuab yog txoj kev coj mus cuag qhov ntshiab’ thiab mloog 3 lub koom haum ua hauj lwm pab daws teeb meem hauv lub cuab tham txog lawv cov hauj lwm xws li pab saib xyuas cov me nyuam ntsuag, cov me nyuam yug los puas cev, cov tub ntxhais raug kev tsim txom hauv lawv tsev neeg. Nyob hauv hnub peb yog hnub tim 27 lub 11 hlis, sawv daws sib tham txog lub luag hauj lwm yav tom ntej saib yuav mus zoo li cas.

Npuag Choj Thoj yug ib tug sawv cev ntawm tsoom Hmoob mus tham txog txoj kev sib hlub hauv lub cuab yim neeg hais tias yam tseem ceeb tshaj plaws hauv nws lub cuab tsis yog nyiaj txiag, tab sis yog me nyuam. Nyiaj txiag tsuas yog luag li xwb, txawj los nrhiav yus thiab yuav txawj ploj mus; tab sis me nyuam yog yus txoj kev sib nyiam sib hlub, yog yam yuav nyob mus li.

Niam Nchaiv Nas Vaj hais tias thaum nws hnov nkawm niam txiv sib yuav tshiab tshiab piav txog nkawd txoj kev sib hlub ua rau nws poob kua muag, nkawd piav tias thaum nkawd ua hluas nkauj hluas nraug ntawd, tus poj niam mob ntsws ces tau muab ib lub ntsws txiav pov tseg lawm, nws lub neej nyob tau tsis ntev, tsis paub yuav nyob tau ib xyoos los ob xyoos tej xwb. Thaum nws tus hlub paub li ntawd, tus hlub tsis tso nws pov tseg, tab sis txiav siab yuav nws los ua ib cuab nyob ua ke kom tau tu nws thiab saib xyuas nws txoj sia tshuav tsis ntev no.

Niam Nchaiv Nas Vaj hais ntxiv tias tos nws kua muag poob vim nws rov tig muab los saib hauv haiv neeg Hmoob, mas thaum ib tug tau mob hnyav zoo li ntawd, tsev neeg yuav tsis pub nkawd sib yuav, tus hlub los ntshe yuav tsis kam yuav tus tab tom mob hnyav nyob tsis ntev ntawd. Thiab ib qho tuaj mas nyob hauv nws tsev neeg kiag, nws pom tias nws thiab nws tus txij nkawm twb muaj kev sib hlub loj tsis npaum ob tug me nyuam hluas no.

Txiv Tswv Qhia Xis Vis Os – Xis Lis Phoos ua tswv cuab coj lub txoos teev Ntuj xaus lub rooj sau siab zaum no, nws hais lus ntuas sawv daws tias cov tsheb xa roj av mus rau cov kws muas roj av, cov tsheb ntawd yuav tsum muaj roj av nyob hauv lawv, mas cov tsheb thiaj yuav xa cov roj av mus tau; yog muab piv rau cov txij nkawm ces yuav zoo li ntawd, cov txij nkawm yuav tsum muaj kev sib hlub nyob hauv lub cuab thiaj yuav coj txoj kev sib hlub no mus cuag lwm lub cuab tau. Thov kom sawv daws mus ua neej nyob hauv txoj kev sib hlub.

Tus sau: Txawj Tsav M. Lauj