COV IS NTIAS NQUA HU KOM TSEEM HWV TSO TSEG TSAB CAI TXWV TSIS PUB NEEG HLOOV SIAB TSHIAB

Cov pej xeem Is Ntias thiab cov neeg ntseeg txog Yes Xus sawv los nqua hu tseem hwv kom tso tseg tsab cai txwv tsis pub neeg hloov siab tshiab txawm tias lub xeev Kas Nas Tas Kas tab tom yuav pom zoo siv tsab cai no.

Tsab cai txwv neeg hloov siab tshiab los yog hloov kev teev hawm no mas cov kws lij choj twb tsa tes pom zoo txij hnub tim 24 lub 12 hlis tsaib no lawm, tsuas tos tseem hwv pom zoo kom thau los siv xwb.

Lub koom haum National Solidarity Forum (NSF) hais tias “Yog tias tsab cai txwv tsis pub neeg hloov siab tshiab no raug tseem hwv thau los siv, mas cov neeg siab phem yuav muaj cai iab hiam cov neeg me thiab cov haiv neeg nyob ntug zos.”

Kev sawv los nqua hu zaum no yog ua raws lub teb chaws kev cai lij choj thiab tsab cai tiv thaiv haiv neeg me li cai.