Cov teb chaws As Xias thov kom G-7 cov thawj coj txhob txwv kev faib Vaccine

Lub Koom Haum saib tib neeg lub cev thiab kev ncaj ncees nyob As Xias teb thov kom cov thawj coj G-7 txhob txwv hais txog kev txais Vaccine Covid-19.

Lub Koom Haum Peoples Vaccine Allinace-Asia tau soj ntsuam cov teb chaws nyob As Xias, pom tias cov neeg mob Coronavirus muaj coob dua qub tuaj, thiab kev muaj mob yuav ua kom cov neeg pluag txom nyem coob tuaj. Cov teb chaws nyob As Xias tau nkaug tshuaj Vaccine tsawg dua 10 feem pua ntawm tas cov pej xeem. Cov nom nyob hauv cov teb chaws li hais no, lawv npaj siab qhib kev rau tsoom pej xeem tau nkaug tshuaj Vaccine, tab sis tsis muaj Vaccine txaus. Ces txhais tias cov teb chaws As Xias txoj kev nkaug tshuaj Vaccine yuav tsis tiav raws li lub hom phiaj. Tab sis cov neeg nyob hauv cov teb chaws As Xias tsuas tau nkaug tshuaj Vaccine li ntawm 10 feem pua xwb. Xyoo no cov neeg kis tus kab mob Coronavirus nyob As Xias teb nce siab heev, ces ntau lub tuam tsev ua hauj lwm raug kaw thiab ntau thaj tsam raug txwv tsis pub neeg tawm mus txawv xeev (Lock down).

Lub 5 hlis tag los no cov teb chaws nyob As Xias naj, xws li Is Ntias teb, Nes Pas teb thiab Pas Kis Taas teb muaj neeg kis tus kab mob coob kawg. Nyob As Xias toob fab naj kuj muaj neeg kis tus kab mob coob kawg, xws li Thaib teb, Nyab Laj teb, Khas Phus Chas teb thiab Los Tsuas teb. Lub hlis tag los, nyob Tis Mos sab hnub tuaj cov neeg mob coob dua qub tuaj 2 npaug. Tam sim no cov tseem hwv nyob hauv cov teb chaws li hais no tab tom muab siab rau nrhiav tshuaj Vaccine los pab lawv cov pej xeem, tab sis pom tias cov teb chaws As Xias tau txais Vaccine tiv thaiv tsawg heev. Cov neeg As Xias 7 feem pua yog cov uas lawv tau nkaug tshuaj Vaccine 1 zaug xwb.