Cov tub ntxhais hluas Zis Pees khiav mus nrhiav noj nyob txawv teb chaws

Friday, December 23, 2022

Nqi zog qis thiab kev ua hauj lwm dhuav siab ntawm cov neeg Zis Pees, ua rau cov neeg Zis Pees coob kawg yuav tsum khiav tawm mus nrhiav noj nyob txawv teb chaws.

Raws kev soj ntsuam hauv cov tuam tsev ua hauj lwm nyob Zis Pees teb 11,000 lub tsis ntev los no, pom tias muaj ib nrab ntsib teeb meem tub zog muaj tsis txaus.

Teeb meem tsis muaj tub zog txaus, tsis yog los ntawm cov neeg hnub nyoog siab coob tuaj, tab sis yog los ntawm cov tuam tsev tsis kam nce tus nqi zog kom siab. Yog koj taug kev hauv tej nroog loj loj, mas yuav pom tias ntau lub tuam tsev raug kaw, vim tsis tuaj yeem nrhiav tau tub zog. Ces tsis yog ib qhov txawv txav uas cov tub ntxhais hluas tab tom nrhiav tias lwm teb chaws nyiaj hli puas siab dua.

Tus nqi zog qhov qis kawg nyob hauv kev ua hauj lwm dhau sij hawm, mas tsis txaus ntseeg tias yuav qis txog 850 yees los yog 6 dos las nyob hauv ib teev xwb. Hos cov nyiaj hli txwm sij hawm, mas tsis pub kom leej twg khaws tau tseg li.

Takumi San uas nws muaj 27 xyoo hais tias tom qab nws kawm ntawv tiav, mas nws txiav txim siab khiav mus Aus Thas Lias teb, nws ua hauj lwm nyob hauv teb txiv thiab de txiv. Dhau mus ib xyoos nws tuaj yeem khaws tau nyiaj li ntawm ib plhom yees los yog 7,500 dos las. Yog tias nws nyob Zis Pees teb ntxiv mus, mas nws yeej khaws tsis tau nyiaj npaum ntawd. Nyob Zis Pees teb tsis tuaj yeem yuav khaws tau nyiaj ib hlis 10,000 yees. Qhov teeb meem uas yuav raug tom ntej no, mas yog tam sim no Aus Thas Lias teb tub zog coob dhau lawm, ces thiaj ua rau cov tuam tsev tsim toob xib nyob Zis Pees teb nrhiav tub zog los ua hauj lwm Part time los yog dhau sij hawm tsis tau lawm. Cov tuam tsev tsim toob xib ib feem peb tsis muaj tub zog ua hauj lwm hlo li.