COV TUB ZOG KHIAV TAWM HAUV HOS CIS MEES UA NTEJ TUS KAB MOB YUAV SIB KIS

Tsoom tub zog txawv teb chaws ntau pua txhiab leej khiav tawm ntawm lub nroog uas vam meej thiab muaj cov tuam tsev tsim toob xib ntau. Lawv khiav rov mus tsev, vim lub nroog raug kaw. Muaj ntau yim neeg rov mus tsev uas yog taug kev taw xwb. Muaj ib tug txiv neej uas nws thiab tsev neeg tab tom taug kev taw rov mus tsev hais tias : “Kuv poob hauj lwm los tau 3 lub hlis lawm, yog peb rov mus tsev, mas peb yuav tau nyob nyab xeeb dua”.

Lub lis piam tag los nyob hauv lub nroog Hom Cis Mees, lub nroog Binh Duong thiab nroog Dong Nai mas tsheb khuam ntau kawg ntawm tej kev. Tsoom tub zog tau tso lawv txoj hauj lwm nrog rau lub nroog uas muaj kev tsim ntau yam tseg, thiab lawv rov mus tsev, vim sawv daws ntshai tus kab mob COVID-19.

Txij hnub tim 1 lub 10 hli los, tsis hais caij tsheb Motor los yog taug kev taw thiab ev tej nras toob xib hnyav, muaj cov neeg Nyab Laj ntau pua txhiab leej pib khiav tawm hauv lub nroog Hom Cis Mees, vim tsis muaj hauj lwm rau lawv ua lawm.

Txij lub 7 hli los, kev sib kis kab mob thiab tuag nyob Nyab Laj teb muaj ntau kawg. Muaj cov neeg mob COVID-19 li ntawm 14,000 leej nyob hauv ib hnub.

Vim tus kab mob sib kis loj zuj zus, ces cov tseem hwv thiaj muaj txoj cai kaw (Lock down) cov thaj tsam uas muaj kab mob sib kis ntau.

Yawg Khias hais tias : nws nco tau tias muaj ib yim neeg tau txais kev pab los ntawm 2 tug viv ncaus uas caij ib lub tsheb Motor rov mus tsev, nyob ntawm tog kev nws pom 2 tug viv ncaus nqa ib daim duab, nws thiaj nug tias daim duab nkawd nqa ntawd yog leej twg ? Nkawd teb tias : yog nkawd niam uas tuag vim tus kab mob COVID-19 hnub tim 3 lub 9 hlis. Nkawd tab tom nqa nkawd niam cov hmoov pob txha rov mus tsev.