Cov tub zog txawv teb chaws rov qab nkag Thaib teb

Ua ntej tsis tau muaj tus kab mob COVID-19 tshwm sim, Thaib teb yog lub teb chaws uas muaj cov tub zog txawv teb chaws nyob li ntawm 1 plhom tawm leej. Vim tus kab mob tshwm sim, ces sawv daws raug ntiab thiab khiav rov qab tas. Tab sis txog hnub no cov tub zog Mias Mas, Khas Phus Chas thiab Los Tsuas rov nyiag tuaj nkag Thaib teb coob zuj zus. Cov raug cai kuj muaj, cov tsis raug cai kuj muaj, ces tseem hwv Thaib pib txhawj xeeb tias tsam tus kab mob yuav rov sib kis loj.

Vim Thaib teb rov qhib teb chaws thiab vam tias yuav txhawb nqa kom kev lag luam rov vam meej tuaj, ces thiaj muaj cov tub zog txawv teb chaws rov qab mus Thaib teb coob heev. Cov tub zog txawv teb chaws, lawv yog ua cov hauj lwm xws li : txhim vaj txhim tsev, ntes ntses thiab ua liaj ua teb.

Vim li no, rooj pwm tsav fab kev tswj hwm tub zog nyob Thaib teb thiaj pib soj ntsuam cov tub zog tsis muaj ntaub ntawv kom tag rau lub 11 hlis no. Thiab nrog lwm cov teb chaws sib tw txais tub zog txawv teb chaws ua hauj lwm nyob Thaib teb kom coob thiab raug cai ntau tuaj. Yuav ua kom kev txais cov tub zog txawv teb chaws tuaj tshiab 1 xyoos li ntawm 600,000 leej raws li rooj pwm tsav fab tub zog teeb tseg.