DOHA RHUAV TSHEM TXOJ CAI KHAS FAS LAS

Doha yog lub tuam ceeb nyob Kas Tas teb, tseem hwv Kas Tas tau rhuav tshem txoj cai Kafala uas tsa los siv rau cov tub zog neeg txawv teb chaws xyoo 2019. Tam sim no cov tub zog neeg txawv teb chaws tuaj yeem hloov lawv txoj hauj lwm tau lawm, tsis tas yuav thov ntawv tso cai ntawm tseem hwv los sis tus tswv ntiav zog. Tsis tas li ntawd, cov tseem hwv Kas Tas kuj nce tus nqi zog yam qis nyob ntawm 275 US dos las. Thiab tus tswv ntiav zog yuav tsum them nqi noj haus thiab nqi vaj nqi tsev. Yog tias ib tug tub zog twg ua hauj lwm txwm 2 xyoos lawm, mas nws tuaj yeem hloov nws txoj hauj lwm tau, yam li yuav xub cev daim ntawv tso cai ua ntej ib lub hlis. 
Tseem hwv Kas Tas daws txoj cai no, yog vim tsis xav kom cov tub zog yuav tsum nrog lawv tus tswv ntiav zog sib khi nyob ntau xyoo. Cov tub zog neeg txawv teb chaws nyob Doha feem coob yog tuaj ntawm Nes Pas teb, Fis Lis Pees teb thiab Is Ntos Nes Xias teb tuaj. Feem coob yog ua zog nyob hauv cov tuam tsev lag luam, nyob hauv cov Koom Haum txhim vaj txhim tsev thiab feem tsawg yog ua hauj lwm tus vaj tu tsev rau cov neeg nplua nuj. Yav tag los cov tub zog neeg txawv teb chaws nkag mus ua hauj lwm nyob Kas Tas teb, mas lawv yuav tsum raug khuav phau Passport, ces lawv tsis tuaj yeem yuav tawm tau ntawm lawv txoj hauj lwm. Lawv ntshai kom cov teeb meem lawv raug rau cov tseem hwv, vim lawv ntshai tsam raug ntes xa rov qab. Kev daws txoj cai no ua rau coob leej neeg ua hauj lwm fab kev ncaj ncees thiab ntau lub Koom Haum txhim kho pej xeem zoo siab thiab qhuas txog. Vim nws yog ib txog kev ua xoob rau cov tub zog thiab kev lag luam ntawm cov tub zog neeg txawv teb chaws. Tam sim no muaj cov tub zog neeg txawv teb chaws nyob Kas Tas teb li ntawm 2 plhom leej, tsuas muaj 95 feem pua thiaj yog cov tub zog Kas Tas xwb.