FIS LIS PEES TEB UA TSWV CUAB TSA LUB ROOJ SAU SIAB ZAUM 2, HAIS TXOG PHAU NTAWV QHUAB QHIA TUB NTXHAIS HLUAS ‘YOUCAT’

Fis Lis Pees teb yog lub teb chaws muaj cov neeg ntseeg Kav Tos Liv coob tshaj nyob As Xias. Thiab yog lub teb chaws ua tswv cuab tsa lub rooj sau siab ntawm txhua txhua lub teb chaws hais txog cov tub ntxhais hluas neeg ntseeg nyob hauv lub nroog Is Los Is Los (City of Iloilo), yog zaum tim 2 hais txog phau ntawv “Youcat”. Lub rooj sau siab tsa nyob hauv hnub tim 7 txog tim 10 lub 11 hlis 2019 dhau los. Muaj cov tub ntxhais hluas tuaj sib sau siab 1,200 leej, thiab yog tuaj ntawm 19 lub teb chaws tuaj. Tswv Qhia Nkas Nplias Nkas Xas tiam lis nyob Fis Lis Pees teb ua tus tswv cuab ntawm lub rooj sau siab. YOUCAT yog lub npe hu yooj yim ntawm lub Koom Txoos Kav Tos Liv ib phau ntawv qhuab qhia tsoom tub ntxhais hluas. Pib muaj phau ntawv YOUCAT qhuab qhia tsoom tub ntxhais hluas xyoo 2011, thiab luam ua ntau xeem lus. Yog ib phau ntawv pab qhuab qhia tsoom tub ntxhais hluas kom lawv txawj tshawb fawb nrhiav tej yam zoo nyob hauv lawv lub neej los txhawb lawv txoj kev ntseeg. Kom lawv muaj txoj kev ntseeg ruaj khov thiab ntseeg txog cov lus nyob hauv ntawv Moo Zoo. Xyoo 2011, lub rooj Tswv Qhia nyob Aus Rias teb (Austria) tau luam phau ntawv YOUCAT nyob hauv lub nroog Mas Ntis, teb chaws Xyis Pas Yas. Xyoo 2011 ntawd yog thawj xyoo muaj lub rooj sau siab ntawm tsoom tub ntxhais hluas neeg ntseeg nyob thoob ntiaj teb. Lub ntsiab lus ntawm lub rooj sau siab, yog hais tias : “Cia li sawv los mas !” Yog ib lo lus nyob hauv Lus Kas ntawv Moo Zoo, zaj 7 qib 11 txog 17. Yog thaum Huab Tais Yes Xus tsa tus poj ntsuam tus tub uas tuag lawm, kom nws sawv rov qab los. Nyob hauv lub rooj sau siab, xav kom tsoom tub ntxhais hluas nrhiav pom Huab Tais Yes Xus txoj kev nyiam kev hlub. Kom tas tsoom tub ntxhais hluas nyob thoob ntiaj teb los ua Huab Tais Yes Xus cov thwj tim, thiab muaj lub siab kub lug tshaj lub Moo Zoo. Vam txog YOUCAT ua qhov chaw tso siab thiab npaj ua hmoov tsuj xeeb txoj kev ntseeg nyob Fis Lis Pees teb txwm 500 xyoo, rau xyoo 2021 tom ntej no.

Tus txhais : Lis Maib, Zoo Tswv Zov Yaj