Hluav taws xob tuag, ua kev kub ntxhov rau lub neej thiab kev tsim tawm

Hluav taws xob tuag yuav noj sij hawm li 8 txog 10 teev nyob hauv txhua txhia hnub, ib tug tub lag luam hais tias : nqi roj av nce siab, ua teeb meem rau cov tshuab tsim hluav taws xob. Hluav taws xob tuag, ua teeb meem rau tas lub nroog thiab tej zej zog. 

Cov tseem hwv hais tias : tos 2 lub lis piam ntxiv, mas txhua yam yuav rov zoo li qub. Tab sis cov tswv tsim tawm ntshai tsam lawv plam cov neeg yuav toob xib uas yog neeg txawv teb chaws.

Npees Las Des teb tab tom ntsib teeb meem hluav taws xob, txhua txhua hnub hluav taws xob yuav tuag li ntawm 8-10 teev. Tsis tas li ntawd, tus nqi roj a uas yuav coj los siv rau cov tshuab tsim hluav taws xob kuj nce siab tuaj, ces ua rau kev tsim hluav taws xob nyob hauv lub nroog thiab cov thaj tsam ua liaj ua teb nres tag. Kev khiav lag luam thiaj yog qhov nyuab nyob hauv txhua txhia hnub. 

Hais txog cov neeg nyiam Bablu Ratno lub tshuab luam ntawv ntawm Kav Tos Liv, qhov tsis ua hauj lwm, vim yog nqis peev siab thiab kev ncua sij hawm xa toob xib rau cov neeg siv. Kev nkim hluav taws xob yog thawj yam teeb meem kub ntxhov. 

R.E.B yog fab hauj lwm nrhiav hluav taws xob rau cov zej zog feem ntau nyob hauv lub teb chaws, tau txais hluav taws xob tsawg dua qhov lawv xav tau nyob hauv niaj hnub li ntawm 30 feem pua. Hluav taws xob tuag li ntawm 10 teev, ua rau kev tsim tawm nres thiab cov neeg ua hauj lwm tsis tau ua hauj lwm yav hmo ntuj. Kev tsis muaj roj a thiab tsis muaj hluav taws xob, ua teeb meem loj kawg rau kev tsim tawm. Cov tswv tsev tsim tawm ntshai tias : kev tsim tawm yuav nres thiab kev xa toob xib tawm yuav poob qis, ces lawv yuav plam cov neeg yuav toob xib uas yog neeg txawv teb chaws. Thiab yuav ua kev piam sij tsis raws li cov lus cog tseg. Kev siv ub siv no nkim pov tseg, cov tub zog tsis tau nyiaj thiab cov tuam tsev tsim toob xib raug kaw tseg. 

2 lub lis piam dhau los, cov tuam tsev tsim tawm raug cov teeb meem no, yam li ib hnub so hauj lwm 3-4 zaug. Vim li ntawd teeb meem ntawm kev siv hluav taws xob thiaj yuav yog teeb meem loj sai sai no. Thaum Xis Laas Kas teb pib muaj teeb meem, mas cov neeg yuav toob xib khiav mus yuav khaub ncaws nyob Npees Las Des teb, thiab tseem muaj Suav teb, Nyab Laj teb uas nyiam yuav khaub ncaws nyob Npees Las Des teb. Yog tsim thiab xa toob xib los yog xa khoom tsis raws sij hawm, mas ntshai cov neeg yuav toob xib yuav khiav mus rau lwm lub teb chaws.