HNUB COV NEEG THOJ NAM THOOB NTIAJ TEB

Tim 20 lub 6 hli txhua xyoo, yog cov neeg khiav ua thoj nam hnub nyob thoob ntiaj teb. 
10 xyoo dhau los no xwb, twb muaj cov neeg thoj nam coob txog ntawm 10 plhom leej lawm. Coob dua 10 xyoo dhau los lawm 2 npaug. 
Hnub tim 18 lub 6 hli 2020 no, lub UNHCR tshaj tias : lub qab xyoos 2019 tsaib no, muaj cov neeg khiav ua thoj nam nyob thoob ntiaj teb li ntawm 80 plhom leej. Xyoo 2018 tsaib ub, lub Leej Haum Kuj tshuaj xwm pom tias cov neeg thoj nam muaj li ntawm 79.5 plhom leej. Xyoo 2019, muaj cov neeg thoj nam txhab ntxiv li ntawm 9 plhom leej. 10 xyoo tag los, cov neeg khiav ua thoj nam nyob thoob ntiaj teb tsuas yog 40 plhom leej xwb. Nyob hauv xyoo 2019 tib xyoos ntawd, muaj cov neeg khiav ua thoj nam li ntawm 11 plhom leej.
 Cov neeg thoj nam nyob thoob ntiaj teb 68 feem pua yog khiav ntawm 5 lub teb chaws tuaj, xws li Xis Lias teb, As Kas Nis Taas teb, Xus Das Naj teb, Mias Mas teb thiab Ves Nes Xes Las teb. 
Cov neeg thoj nam Xis Lias yog 6.6 plhom leej. Cov neeg thoj nam As Kas Nis Taas yog 2.7 plhom leej. Cov neeg thoj nam Xus Das Naj yog 2.2 plhom leej thiab cov neeg thoj nam Mias Mas yog 1.1 plhom leej. 
Nyob Tws Kis teb muaj cov neeg thoj nam li ntawm 3.6 plhom leej, feem coob yog cov neeg Xis Lias. Nyob Kos Loos Npias teb cov neeg thoj nam muaj 1.8 plhom leej, feem coob yog cov neeg Ves Nes Xes Las thiab cov neeg Pas Kis Taas. 
Ib feem pua ntawm tas tsoom neeg nyob thoob ntiaj teb tsis tuaj yeem rov qab mus nyob hauv lawv lub teb chaws, yog vim muaj tsov rog thiab kev quab yuam caij tsuj. Txij xyoo 2012 los, mas cov neeg khiav ua thoj nam nyob thoob ntiaj teb muaj coob zuj zus txog zim txwv no. Tsaib no muaj cov neeg Xis Lias khiav ua thoj nam tawm teb chaws li ntawm 11 plhom leej. Xis Lias teb thiaj yog lub teb chaws uas tsoom pej xeem khiav ua neeg thoj nam coob tshaj plaws nyob ntiaj teb no.