KAV TOS LIV NYOB THAIB TEB UA TXOJ HAUJ LWM PAB COV NEEG THOJ NAM.

Hais txog kev tiv thaiv tus kab mob Covid-19, mas Thaib teb yog ib lub teb chaws uas tiv thaiv tau zoo kawg thiab. Tsis tas li ntawd, lub Koom Txoos Kav Tos Liv kuj tau muab kev koom tes nrog cov tseem hwv Thaib sib pab tiv thaiv. 
Lub Cheeb Koom Txoos nyob Npaas Koj tsis muaj so nyob hauv lub caij tus kab mob Covid-19 sib kis, lub Koom Txoos cov neeg mus tsham xyuas cov neeg thoj nam thiab xaws ntau npog qhov ncauj qhov twg coj mus faib rau tsoom pej xeem. Lawv tseem ua ib co kua tshuaj ntxuav tes mus pab cov neeg thoj nam thiab cov neeg txom nyem, kom sawv daws tau siv tiv thaiv tus kab mob Covid-19. Muaj tej tus neeg thoj nam los sis tub zog txawv teb chaws lawv kuj tau muab lawv cov nyiaj mus yuav mov rau lwm tus neeg noj, txhais tau tias cov neeg thoj nam los sis cov tub zog txawv teb chaws lawv tsis yog nyob tos kev pab xwb. 
Txhua yam xwm tshwm sim nyob hauv tus kab mob Covid-19, ua rau coob leej Txiv Plig thiab cov Tswv Qhia nco txog Vaj Qhia Fas Ntshis Kus cov lus hais hnub tim 27 lub 9 hlis 2017 tias : cov neeg thoj nam yog peb cov kwv tij. Vim lawv xav nrhiav lub neej tshiab, lawv thiaj raug kev txom nyem kev quab yuam thiab nyiaj tshaib yoo nqhis.
Tam sim no tseem tshuav cov neeg Mias Mas khiav ua thoj nam nyob hauv tej lub yeej raws ciam teb Thaib li ntawm 97,000 leej. Dua li ntawd, tseem muaj 5,000 leej neeg thoj nam khiav ntawm 40 lub teb chaws los nyob rau Thaib teb thiab. Txhais tau tias Thaib teb yog ib lub teb chaws ua tswv txais cov neeg thoj nam coob txog ntawm 479,000 leej.
Nyob hauv ntau xyoo tag los, muaj lub Koom Haum Kav Tos Liv lub Leej Haum Kuj (UNHCR) cev tes pab cawm cov neeg thoj nam li hais no. Thiab kuj muaj li ntawm 100,000 tus neeg thoj nam tau txais ntaub ntawv ua neeg Thaib nyob Thaib teb.