KEV DAWS TEEB MEEM KUV NTXHOV NYOB AS MES LIS KAS NRAB, PAB CHEEM TAU COV NEEG THOJ NAM

Hais txog kev ua neeg thoj nam ntawm ciam teb Mev Xis Kos thiab As Mes Lis Kas, mas xub pib nyob As Mes Lis Kas Nrab. Lub Koom Haum Kav Tos Liv pab neeg thoj nam hais tias ; cov teeb meem neeg thoj nam no yog ib yam loj uas tseem hwv As Mes Lis Kas yuav tau muab siab rau daws. Cov tub ceev xwm zov ciam teb hais tias lub 1 hlis xyoo no muaj cov neeg thoj nam uas tsis muaj ntaub ntawv li ntawm 78,400 leej, thiab nce los ua 100,400 leej. Lub 2 hlis xyoo no cov neeg thoj nam nce lawm 28 feem pua. Cronin hais tias kev sib kis tus kab mob Covid-19, mas yuav ua kom muaj cov neeg thoj nam coob ntxiv thiab tib neeg lub neej yuav txom nyem dua no. Yog tias muaj kev pab txhawb nqa kom zoo dua no, mas xav tias yuav pab tau cov neeg thoj nam kom lawv nyob twj ywm tau hauv lawv lub teb chaws. Qhov kev txhawb nqa ntawd, yog saib xyuas tsoom pej xeem lub cev ntaj ntsug kom txhob muaj mob thiab pab kev kawm ntaub kawm ntawv. Qhov tseem ceeb tiag mas yog muab siab rau txog cov tub ntxhais hluas lub neej, kom lawv tau txais kev kawm qhia ua hauj lwm thiab muaj feem nrog ib zeej tsoom neeg, vim nws yog lub zoo caij uas lawv yuav tau ua tus coj thiab pab txhim kho kev nyob noj kom zoo tuaj.
Cov neeg thoj nam coob zuj zus tuaj nyob hauv lub 1 hlis txog lub 5 hlis thiab lub caij ntuj no mus txog caij ntuj sov, mas yuav ua rau cov neeg thoj nam uas hla suab puam ntsib xwv txheej ntau yam.