KEV KAWM HAUV CAIJ COVID-19

Hais txog tus kab mob Covid-19, mas ua teeb meem loj kawg rau kev kawm nyob txhua txhia lub teb chaws. Tab sis Vas Tis Kas hais tias hais txog tib neeg txoj kev sib raug zoo, mas yeej yuav tsum yog cov xib hwb qhia ntawv thiab tsoom tub kawm ntawv nquag sib tham thiab sib qhia, vim qhov no yog ib txog kev kawm kom yus paub. Tsoom tub kawm uas yog neeg ntseeg Kav Tos Liv, mas lawv kheev kheev hais txog Vaj Qhia tsab ntawv uas sau rau cov tsev kawm txuj txheej siab uas yog Kav Tos Liv nyob thoob ntiaj teb. Nyob hauv tsab ntawv muaj cov ntsiab lus hais txog kev tu siab ntawm kev kawm txuj lub caij tus kab mob Covid-19 sib kis. Tsis hais fab kev kawm nyob hauv tej tsev kawm ntawv los sis kawm nyob hauv Internet thiab kawm nyob kev deb. Pom meej tias muaj tshaj 10 plhom tus me nyuam uas lawv yuav tsis tau txais kev kawm rau yav tom ntej. Ces hais txog txoj kev kawm txuj yuav tu ncua zuj zus nyob hauv cov neeg pluag txom nyem. Tsis tas li ntawd, yog tsis tau txais kev pab los ntawm cov tseem hwv nyob hauv nyias lub teb chaws, mas tej tsev kawm ntawv thiab cov tsev kawm txuj txheej siab Kav Tos Liv yeej yuav raug kaw rau yav tom ntej ib yam. Lub caij muaj tus kab mob Covid-19 no, kev kawm nyob hauv xov tooj los sis hauv internet yog ib qho zoo uas cov me nyuam tau nrog lawv cov xib hwm tham ib yam li zaum nyob ua ke. Tab txawm lawv tsis tau mus kawm nyob hauv tsev kawm ntawv, tsis kav lawv kuj tau nrog tus xib hwb sib tham thiab ua kev nkag siab.