KEV KHAJ CAI NYOB THAIB TEB YOG LUB ZOG RAU HAIS NEEG LOS TSUAS TAIJ THOV KEV TWJ LIJ

Vim yog tau txais lub zog txhawb siab ntawm cov neeg Thaib txheej tshiab uas lawv khaj cai nyob Thaib teb, ces ob peb hnub dhau los no muaj cov neeg Los Tsuas ntau txhiab leej sau ntawv nyob hauv Social Media xyav txog tseem hwv txoj kev kav teb chaws thiab lawv taij thov kev twj lij.

Los Tsuas teb kav teb chaws raws txoj cai koom tshaj, ces yog leej twg xyav lus tsis zoo txog tseem hwv txoj cai, nws yuav tsum raug kaw nkuaj. Tab sis cov neeg Los Tsuas uas lawv siv Internet, mas lawv tiv tseem hwv txoj cai nyob hauv Twitter heev kawg.

Lawv taij thov cov tseem hwv kom muaj kev twj lij rau tsoom pej xeem tawm tswv yim ywj siab, kom tau daws txhua yam teeb meem kev nyiag noj nyiaj, kev ua tsis ncaj ncees thiab daws teeb meem ntawm cov neeg pluag txom nyem. Lawv sau cov lus nyob hauv Online hais txog cov tseem hwv Los Tsuas noj se, yam li cov tsev kawm ntawv tsis tau txais kev pab ntawm cov tseem hwv kom txaus, ua rau tsoom pej xeem tsis tau kawm ntawv siab thiab tsis muaj kev txawj ntse. Tab sis tej tub nom tub tswv, mas tau mus kawm nyob txawv teb chaws. Lawv tau tawm tsam hais txog kev luaj teb ntov hav zoov thiab kev lag luam poob qab, vim tseem hwv txoj cai.

Cov tub ntxhais hluas kev khaj cai nyob Thaib teb, ua kom cov tub ntxhais hluas Los Tsuas ntsia pom txog txoj hau kev yuav taij kev ncaj ncees ntawm cov tseem hwv, thiab yog tus piv txwv uas tsoom tub ntxhais hluas Los Tsuas yuav xyaum ua raws. Tam sim no kev tawm tsam tiv cov tseem hwv Los Tsuas nyob Online mas yog Milk Tea Alliance ua tus coj.

 Kev pib tawm tsam tiv cov tseem hwv Los Tsuas, mas tsis tau muaj tshwm sim ntawm tej pab neeg sib sau, tab sis muaj nyob hauv Online lawm. Milk Tea Alliance kuj txhawb nqa kev khaj cai nyob Thaib teb thiab nyob Hooj Koos. Cov neeg ua hauj lwm nyob hauv Mile Tea Alliance feem coob, yog nyob Fis Lis Pees teb thiab Thais Vas teb (Taiwan).