Kev lag luam nyob Zis Pees teb tsis muaj tus ua ntxiv mus

Lub tuam tsev siv tshuab ntawm Kiyoshi Hashimoto uas nyob ntawm ntug nroog Tokyo, ntsia ntxim li nws xa hluav taws xob rau cov Koom Haum tsim toob xib, tab sis tam sim no nyob ntsiag to thiab hnov lub suab kho nrov xwb.

Hashimoto uas nws hnub nyoog 82 xyoos, nws tsim nws lub Koom Haum 40 xyoo tag los, tab sis nyem no nws so laus lawm. Nws tsis muaj ib tug neeg los tuav nws cov hauj lwm ntxiv mus, los yog tsis muaj ib tug neeg los yuav nws lub Koom Haum ua ntxiv mus kom txuag tau cov neeg tuaj yuav khoom. Tej yam no yog teeb meem uas tseem hwv Zis Pees tshaj tias yuav ua kev kub ntxhov 1 feem 3 ntawm kev lag luam loj thiab me nyob hauv lub teb chaws rau xyoo 2025. Vim yog tsoom pej xeem Zis Pees tsawg zuj zus thiab cov neeg laus coob tuaj.

Hashimoto hais tias : “Yog kuv muab kuv lub tuam tsev kaw tseg, mas tas txhua yam ploj ntais”. Nws lub tuam tsev lag luam yog nyob hauv Yachimata uas nyob sab hnub tuaj hauv Tokyo. Nyob sab hauv muaj tej rooj ua hauj lwm thiab nyuag ub nyuag no txhij txhua. Muaj ib zaug nws tau ntiav 10 tus neeg ua hauj lwm, tab sis nyem no tsuas muaj 2 tug neeg ua hauj lwm dhau caij xwb, vim nws cov hauj lwm tsawg lawm.

Shigenobu Abe ntawm lub Koom Haum tshawb fawb Teikoku Databank hais tias : cov teeb meem no muaj tshwm sim ntau heev, ces Zis Pees teb poob nyob hauv lub caij txhua yam raug vis tas. Raws kev tshaj tawm ntawm cov tseem hwv nyob hauv xyoo 2019, cov tsev lag luam me muaj 1 plhom tawm tus neeg uas lawv hnub nyoog yuav nto 70 xyoo hauv xyoo 2025, thiab tsis muaj neeg ua lawv txoj hauj lwm ntxiv mus. Cov teeb meem no yuav ua rau cov tub zog poob hauj lwm li ntawm 6 plhom tawm leej thiab kev lag luam hauv lub teb chaws yuav poob qis li ntawm 22 plhom yees. 

Txog xyoo 2029, tas txhia yam yuav phem zuj zus mus txog thaum cov hluas muaj hnub nyoog 81 xyoos. Cov neeg ntawd feem coob yog cov thawj tswj ntawm cov Koom Haum lag luam. Nod yog raws li kev soj ntsuam ntawm Teikoku Databank.

Hais txog cov tsev lag luam me nyob Zis Pees teb, mas kawg tso tseg rau nws tsev neeg los sis cov tub zog uas ntseeg siab ua ntxiv mus. Txawm li ntawd tsis kav kev lag luam kuj laug caij ntxiv mus thiab yog ib qho ua rau cov hluas tsis nyiam.

Cov tsev lag luam uas nyob deb nroog thiab nyob toj siab lawv yuav tsum ua tiag ua ntxiv mus, vim lawv nyiam lub neej nyob hauv nroog thiab cov pej xeem nyob pem tej toj siab tsawg zuj zus. Cov tswv tsev tsim toob xib uas lawv laus lawm, lawv hais tias kev muag yus lub tuam tsev ua lag luam rau lwm tus neeg, mas yog ib qho txaj muag kawg. Tej tus cia li kaw lawv lub tuam tsev twj ywm, lawv tsis nrhiav lwm tus neeg yuav lawv lub tuam tsev lag luam thiab ua ntxiv mus, vim lawv txaj muag.

Tseem hwv Zis Pees tau nrhiav ntau txoj kev lag luam los pab daws cov teeb meem no, tab sis tsis paub tias xyov yuav zoo li cas yav tom ntej.