KEV SIB KIS COVID-19 HAUV COV YEEJ KAW NEEG NKAG TEB CHAWS HAUV THAIB TEB

Tib hnub xwb muaj yuav luag 300 leej nyob hauv 2 lub yeej kaw neeg nkag teb chaws mob Covid-19, nyob hauv tuam ceeb Bangkok. 
Xov xwm tshaj tias kev sib kis tus kab mob Covid-19 nyob hauv cov  yeej kaw cov neeg nkag teb chaws nyob Bangkok, mas yav tag los ib lub yeej txaus 1,200 tus neeg nyob. Tab sis vim muaj kab mob sib kis, ces tsuas pub ib lub yeej 500 tus neeg nyob xwb.
Yog tias koj yog ib tug neeg Pas Kis Taas uas raug liam tias hais lus thuam luag tej, tej zaum koj yuav raug txiav caj dab. Tsis yog li ntawd cov neeg thoj nam Mawv Xis Lim Los Hees Yas uas raug cov tub rog Mias Mas caum tua nyob tsis muaj chaw ntau lub hlis tag los, Thaib teb kuj yog lawv qhov chaw khiav nkaum. Tiam sis teeb meem yog qhov tseem hwv Thaib tsis kam lees txais cov neeg thoj nam lawv tej lus thov, ib yam li cov Pas Kis Taas thiab cov Los Hees Yas lawv tej lus thov ua neeg thoj nam. Tam sim no muaj ntau txhiab leej thov ua neeg thoj nam tiag taw nyob Thaib teb, vim lawv vam tias lawv yuav tau mus tsim lub neej tshiab nyob hauv cov teb chaws tim 3. 
Yog xav paub tias nyob hauv cov yeej kaw neeg thoj nam sib txiv sib ti thiab muaj teeb meem npaum cas, mas yuav tsum soj ntsuam li no : nyob hauv tib hnub tim 23 lub 3 hlis xyoo no xwb, twb muaj 297 tus neeg nyob 2 lub yeej kaw neeg nkag teb chaws mob Covid-19 lawm. Ntau hnub tag los no, muaj cov neeg thoj nam 77 leej tuaj ntawm Mias Mas teb, Los Tsuas teb thiab Khas Phus Chas teb kis tus kab mob Covid-19.