Kev siv cov me nyuam yaus ua hauj lwm thiab kev sib yuav ntxov txhab ntxiv nyob Is Ntias teb, vim tus kab mob COVID-19

Kev sib kis tus kab mob COVID-19 ua kev piam sij loj kawg rau fab kev kho mob tshaj lwm cov teb chaws. Tsev kawm ntawv raug kaw tseg thiab cov me nyuam tau txais kev kub ntxhov loj kawg. Cov me nyuam uas raug kev kub ntxhov, lawv pom tias lawv tus kheej tsis tau kev kawm txaus thiab txhua yam piam sij tas.

Cov teb chaws nyob As Xias Naj, suav txij thaum tus kab mob pib tshwm sim los, muaj cov poj niam yuav txiv hnub nyoog tseem me coob thiab cov me nyuam raug quab yuam ua qhev coob dua qub tuaj. Nyob hauv lub xeev Andhra Pradesh uas nyob toob fab naj hauv Is Ntias teb ntawm Npees Nkos, mas cov xwm txheej no tshwm sim ntau heev. Pom tias cov poj niam hnub nyoog me yuav txiv thiab cov me nyuam raug quab yuam ua qhev coob tuaj li 2 npaug.

Raws kev soj ntsuam ntawm cov tseem hwv, mas pom tias 29 feem pua ntawm cov ntxhais hluas nkauj hnub nyoog 20-24 xyoos yuav txiv thaum lawv hnub nyoog tseem yau. Cov poj niam no 12 feem pua xeeb thawj plab me nyuam thaum lawv muaj 15-19 xyoos. Rajarapu hais tias : nyob toj siab, lawv tsis ua raws li lub hnub nyoog uas tseem hwv teem cia sib yuav. Cov me nyuam ntxhais thiaj sib yuav thaum lawv muaj 14 xyoos, vim lawv niam lawv txiv xav kom lawv yuav nrog cov tub hluas hnub nyoog ib yam.

Vim tus kab mob COVID-19, ces thiaj ua rau nqi tshoob kos nqis me ntsis tuaj, vim tej niam tej txiv poob hauj lwm, ces lawv thiaj kav xyeem lub sij hawm no sib yuav tsam tom ntej rov nce nqi tuaj. Kev muaj mob thiab pluag txom nyem, ces ntau yim neeg yuam kom lawv tej me tub me ntxhais tawm mus nrhiav hauj lwm ua. Tab txawm tau txais kev pab me ntsis ntawm cov tseem hwv, tsis kav yog cia tej me tub me nyuam nrog niam txiv nyob, ces lawv yeej nrhiav tsis tau hauj lwm ua li.