KEV TAWM TSAM NYOB THAIB TEB.

Zim txwv no muaj cov tub kawm ntawv ntau pua leej sib sau tawm tsam tiv cov tseem hwv Thaib, vim lawv xav ntiab tus thawj pwm tsav Thaib kom nws tawm mus. 
Cov tub kawm ntawv tawm tsam, lawv xav kom cov tseem hwv Thaib tawm thiab rov sau txoj cai tshiab. Muaj lwm cov tub kawm ntawv nyob txawv xeev kuj tau mus koom nrog cov tub kawm ntawv nyob hauv lub xeev Rayong sib sau tawm tsam thiab. 6 xyoo tag los no, tus thawj pwm tsav Thaib hu ua Prayut Chanocha uas nws yog ib tug thawj tub rog, nws tau txeeb tus nom ntawm cov tsho liab thiab tso daj los kav teb chaws txog zim txwv no. 
Tam sim no muaj cov tub kawm ntawv sib sau tawm tsam ntiab tus thawj pwm tsav nyob hauv ntau lub xeev. Cov teeb meem kuj yog los ntawm tus thawj pwm tsav tso lus rau cov tub rog His Xas Lais so nyob Thaib teb thiab tawm mus kav kiab khw. Ua rau tsoom pej xeem cav ncha ntws hais txog kev sib kis tus kab mob Covid-19, ces cov tub kawm ntawv thiaj tawm tsam tiv tus thawj pwm tsav Thaib. Lub lis piam tag los, muaj 2,500 tus tub kawm ntawv taug kev nyob hauv tuam ceeb Npaas Koj tawm tsam ntiab cov tseem hwv Thaib. 
Txij xyoo 2014 los, mas zaum no yog thawj zaug uas muaj neeg sib sau tawm tsam tiv cov tseem hwv. Kev tawm tsam tiv cov tseem hwv, twb muaj los tau ntau hnub lawm, tab sis txog tav no tseem tsis tau muaj ib tug neeg twg raug ntes li. Tus thawj pwm tsav Prayut yog tus thawj pwm tsav kev xaiv tsa ntawm tsoom pej xeem nyob rau tsaib no, tab sis nws kav teb chaws mus raws lub zog ntawm tub rog. Cov tub kawm tawv tsam tiv cov tseem hwv, vim kev kav teb chaws raws lub zog tub rog, mas tsis muaj kev ncaj ncees rau pab nom sawv pej xeem cev. Thiab cov tub kawm tsis txaus siab rau tseem hwv txoj kev kav teb chaws, vim lub caij tus kab mob Covid-19 sib kis, mas ua rau kev lag luam hauv lub teb chaws poob qis thiab ua rau tsoom tub kawm thiab tsoom pej xeem nrhiav tsis tau hauj lwm ua. 
Nyiaj txiag ntawm lub tuam txhab nruab nrab GDP kuj poob qis lawm 8 feem pua nyob hauv xyoo 2020 no. Nyiaj txiag ntawm fab kev ncig tsham teb chaws kuj poob li ntawm 47,000 plhom dos las, ces ua rau lub teb chaws tshuav nuj nqis ntau. Vim cov nyiaj txiag ntawm kev ncig tsham teb chaws, yog ib pob nyiaj uas tau ntau tshaj lwm yam kev lag luam. Hais txog tus kab mob Covid-19 nyob Thaib teb, mas vam tias yuav ntsiag zuj zus rau lub 9 hlis pib. Lub rooj pwm tsav saib xyuas kev ncaj ncees hais tias cov tseem hwv kuj pom zoo kom tseem hwv daws cov teeb meem kub ntxhov no thiab tsis pub xyav moo ua dog dig thiab txwv kev sib sau tawm tsam.