KEV TWV TXIAJ YUAM POV NYOB THAIB TEB, MAS YOG IB YAM TEEB MEEM LOJ ZUJ ZUS.

Muaj ntau tug kws txuj txhawj xeeb txog, vim tam sim no kev twv txiaj yuam pov pib nkag mus rau cov tub ntxhais hluas lawm. Raws kev soj ntsuam, mas pom tau tias muaj li 700 txhiab leej poob nyob hauv txoj kev twv txiaj yuam pov. Nyob hauv cov neeg twv txiaj yuam pov ntawd, cov uas hnub nyoog me tshaj yog 7 xyoo. 57 feem pua ntawm tas tsoom pej xeem Thaib, piv li yog 30 tawm plhom leej twv txiaj yuam pov tsis hais yog twv dab tsi. Pom tias cov neeg twv txiaj yuam pov muaj coob dua xyoo 2017 lawm 1 plhom 400 tawm txhiab leej. Nyob hauv 30 tawm plhom tus neeg twv txiaj no, muab faib hnub nyoog raws li no. 733,000 leej yog cov hnub nyoog 15 txog 18 xyoo. 3 plhom tawm leej yog cov hnub nyoog 19 txog 25 xyoos thiab 3 plhom 300 txhiab leej yog cov hnub nyoog 60 xyoo rov saud. Thawj yam kev twv txiaj yuam pov loj tshaj yog tseem hwv tus lej ua luam los muag rau tasoom pej xeem, dhau ntawd mas yog tus lej qab rooj thiab twv txiaj ncaws pob. Xam cov nyiaj ntawm kev twv txiaj no, mas kev twv txiaj ncaws pob yog 160 txhiab plhom npaj. Lej qab rooj yog 153 txhiab plhom npaj, thiab tseem hwv tus lej yog 150 txhiab plhom npaj. Tseem hwv luam tseem hwv cov lej tawm los muag txhua txhua zaus, mas lawv luam li 100 plhom daim. Pom tau tias tseem hwv cov lej uas lawv luam tawm los muag, mas muaj ntau dua tsoom pej xeem Thaib, ces txhais tau tias qhov ntawd yog tseem hwv xav ua kom cov neeg twv txiaj muaj coob zuj zus tuaj. Yog ib txog kev ua kom kev twv txiaj vam meej sai, tab sis tsoom pej xeem twv txiaj coob dua qub.