KUV LUB NEEJ THIAB COV NEEG PLUAG NYOB THAIB QAUM TEB

Thursday, February 11, 2021

1 xyoo nyob hauv lub xeev Chiangrai. Kuv yuav piav txog kuv lub neej rau sawv daws tau nyeem tau paub txog. Tim lub 6 hli xyoo 2019 tsaib ub, kuv thiab 5 tug phooj ywg peb tau caij tsheb ntiav nyob Mochit mus txog Chiangsaen. Peb ntxhov siab kawg, vim tsis paub tias peb lub neej nyob ib xyoos hauv lub xeev Chiangrai yuav zoo li cas. Tom qab ntawd muaj 2 tug Txiv Plig tsav ib lub tsheb tuaj tos peb mus rau hauv lub tsev kawm. Nod yog zaum 2 uas kuv tau tuaj txog ntawm no. Thawj zaug yog tsaib no peb tuaj koom ua cov kab ke tsa tus Tswv Qhia tshiab nyob Chiangrai. Kev tuaj zaum no txawv thawj zaug, vim tuaj zaum no yog tuaj nyob, kawm thiab ua hauj lwm kom txwm 1 xyoos. Peb 6 leej xws li ; 2 tug Leej Tij nyob Bangkok tuaj, 2 tug nyob Chiangrai thiab ib tug nyob hauv lub Cheeb Koom Txoos Chanthaburi. Peb yog tuaj raws kev hu ntawm Tswv Ntuj kom peb tau kawm tau paub thiab tshawb fawb ua ke. Cov yuav ua hauj lwm rau lub Koom Txoos, yuav tsum tau maj mam xyaum thiab kawm txhua yam.

Ntxiv ntawm no mus, yog ib lus piav txog ib tug Leej Tij uas nws tau tawm ntawm lub tsev kawm ua Txiv Plig nyob lub nroog Khorach. Tom qab kawm tiav ib txheej nyob hauv, mas nws tau tawm mus kawm nyob lub tsev kawm ua Txiv Plig hu ua Saengtham uas sawv daws hu kam lub tsev cov Leej Tij txheej siab. Ua ntej yuav mus kawm nyob Saengtham, mas yuav tau xub npaj tus kheej thiab npaj lub siab kom zoo, vim yog ib txoj kev uas yuav nce rau txheej siab los ua Txiv Plig yav tom ntej. Mus kawm nyob Saengtham, muaj coob tug Leej Tij tuaj ntau qhov chaw tuaj. Peb sawv daws kawm ua ke, kawm ntawv Aas Kiv thiaj xyaum hais lus kom peb txawj siv. Peb ib txhij kawm, mloog, sau thiab hais lus. Dhau ntawm kev kawm lawm, peb kuj sib pab ua hauj lwm tu qab vag tsib taug, cog paj ntoos thiab ua ke mus tshaj Ntuj Lus raws cov tsev teev Ntuj nyob ze peb. Peb tau nrog cov Txiv Plig xyaum ua hauj lwm koom nrog tsoom tub ntxhais hluas nyob Chiangrai. Peb tau qhia ntawv Aas Kiv rau cov me nyuam yaus, qhia kev ntseeg thiab qhia cov me nyuam yaus xyaum hu nkauj. Tab txawm peb tsis paub xeem lus lawv hais, tsis kav peb kuj sov siab uas sawv daws tau nyob ua ke xws li ib tse neeg. Peb xyaum ua lub neej tub tshaj Ntuj Lus 1 xyoos nyob Thaib qaum teb. Txawm tias 1 xyoos dhau mus lawm, los peb yeej nco ntsoov cov hauj lwm peb tau ua, vim nws yog kev kawm kom paub rau peb. 1 xyoos uas peb tau nyob hauv lub tsev kawm Xes Vias ua rau peb pom thiab paub ntau yam. Thov ua Tswv Ntuj tsaug thiab ua lub Koom Txoos tsaug ntau ntau.

Vam txog: Leej Tij Amarin ntawm Cheeb Koom Txoos Bangkok.