LAV XIAV YUAV PAB TSEEM HWV NPES LAS LUS TAWM TSAM LIS TUS VAS THIAB NATO.

Lav Xias cov tsheb thauj tub rog hom tsheb Ural thiab KamAz 40 tawm lub tsis muaj tus zauv tsheb khiav ntawm Mos Xaws Kos Vas mus rau ciam teb Npes Las Lus (Belarus). Tam sim no tseem hwv Lav Xias cov tsheb ntawd nres nrug deb ntawm ciam teb li 80 km. Nyob hauv cov tsheb ntawd, tsis paub tias muaj tub rog coob npaum cas. 
Lub lis piam tag los, tus Txoov Tim Tswv Npes Las Lus tau nrog Lav Xias tus Txoov Tim Tswv Pus Tis sib tham nyob hauv xov tooj 2 zaug, ces tus Txoov Tim Tswv Lav Xias hais tias lawv zoo siab yuav pab tiv thaiv kev ruaj ntseg ntawm Npes Las Lus teb thiab yuav txhawb nqa cov tub rog Npes Las Lus lub zog, yog tias muaj yeeb ncuab tuaj ntaus Npes Las Lus teb. Tam sim no mas ntshai cov tub rog Lis Tus Vas (Lithuania) thiab cov tub rog Nato yuav nkag mus ua kev kub ntxhov nyob Npes Las Lus teb, thiab Npes Las Lus tab tom muaj kev sib tawm tsam ua ntxhov quav niab nyob hauv lub teb chaws. Cov tub rog Npes Lus Las tab tom xyaum sib tua rog nyob ze ntawm ciam teb Lis Tus Vas thiab. 
Hnub tim 16 lub 8 hli no, muaj kev sib tawm tsam hnyav kawg nyob Npes Las Lus teb. Muaj ntau pab neeg sib tawm tsam tiv tseem hwv txoj kev xaiv tsa nyob hauv lub teb chaws. Tam sim kev tawm tsam riv mus puv lub teb chaws, vim tsoom pej xeem xav kom tseem hwv rhuav kev xaiv tsa hnub tim 9 lub 8 hli tag los thiab rov xaiv tsa dua tshiab. 
Tsoom pej xeem tawm tsam hais tias cov tseem hwv thiab tus Txoov Tim Tswv ua tsis ncaj ncees, lawv nyiag noj nyiaj xiab thiab noj lub teb chaws cov nyiaj txiag. Ces tsoom pej xeem thiaj sib sau tawm tsam ntiab cov tseem hwv tawm mus. Vim tej kev kub ntxhov no, mas ntshai tsam ho muaj cov yeeb ncuab sab nraud kav xyeem lub sij hawm no tsim kev kub ntxhov rau Npes Las Lus teb, ces tseem hwv Lav Xias thiaj siv lawv cov tsheb thauj tub rog mus nyob ntawm ciam teb tuav pov hwm Npes Las Lus.