Los Tsuas teb yuav txhim 7 lub pas dej tauv nyob hauv tus niam dej Naj Khoom ntxiv mus, tab txawm muaj kev txhawj xeeb li cas kuj xij

Txoj kev xav rau yav tom ntej uas yuav ua “ib lub zeb teeb ntawm As Xias toob fab naj”, tseem hwv Los Tsuas thiaj yuav ua cov pas dej tauv 7 lub nyob hauv tus niam dej Naj Khoom, tiag tiag mas yuav ua 9 lub. Tab txawm tias yuav muaj kev txhawj xeeb thiab ua kev piam sij rau zej zog thiab txhua yam nyob ib puag ncig kuj xij. 

Lub pas dej tauv Phou Ngoy uas loj thiab dav li ntawm 728 megawatt, tau teem caij tias yuav ua kom tiav rau xyoo 2029, thiab yuav koom nrog lub pas dej tauv Xayaburi thiab lub pas dej tauv Don Sahong uas tam sim no tab tom txhim ib yam li lub pas dej tauv Pak Beng, Pak Lay, Louangphabang thiab lub nyob Sanakham. 

Tas txhua yam ntawm kev npaj thiab txhim no yuav siv peev nyiaj txiag li ntawm 2,400 plhom US dos las, uas yog kev nqis peev nrog lub Koom Haum Charoen Energy thiab Water Asia ntawm tseem hwv Thaib thiab tseem hwv Los Tsuas. Kuj yuav muaj lub nroog Pakchom thiab lub zos Ban Khom raws qab thiab koom tes nrog.

Cov hluav taws xob uas tau los ntawm cov paj dej tauv no yog muag rau Thaib, thiab coj mus siv nyob rau Los Tsuas qab teb. Los Tsuas teb tau tsim 10 tawm lub pas dej tauv nyob hauv tus niam dej Naj Khoom thiab lwm cov niam dej tshuam hais txog yav tom ntej los ua “lub zeb teeb ntawm As Xias toob fab naj”, thiab lub hom phiaj ntawm kev cia siab yog muag hluav taws xob rau lwm cov teb chaws nyob hauv xeev ntuj.

Txawm tias tseem hwv Los Tsuas yuav xav tias kev tsim hluav taws xob yog txoj kev txhawb nqa kev lag luam hauv lub teb chaws, tab sis cov hauj lwm tsim pas dej tauv no ua chaw sib cav tas mus li, vim nws ua kev kub ntxhov txog txhua yam nyob ib puag ncig. Pej xeem yuav tsum raug tshais chaw yam tsis tau txais nyiaj pauj kom tsim nyog thiab tej nyiaj txiag tau los ntawm cov hluav taws xob kuj tsis muaj chaw los chaw rau.

Cov hauj lwm txhim pas tauv no tseem tab tom nyob hauv ntu kawg hauv kev sab laj tuav xam ntawm cov neeg nqis peev thiab cov nom tswv hauv cov thaj tsam uas muaj feem cuam. Tom qab ntawd yuav raug xa mus rau lub rooj kav xwm saib xyuas dej Naj Khoom kom tau kev tuav xam txog kev pom zoo thiab sib cog lus ua ntej 6 lub hlis.

Lub rooj kav xwm saib xyuas dej Naj Khoom yog fab hauj lwm ntawm tseem hwv uas ua hauj lwm rau tseem hwv thiab tej zej zog kom tau txuag tas txhua yam raws tus niam dej Naj Khoom.