MIAS MAS : SIB TUAV TES THAM THIAJ TSIM TAU KEV THAJ YEEB.

Lub rooj sab laj kev thaj yeeb Panglong tiam 21 zaum 4, yog hnub tim 19 lub 8 hli xyoo 2020. Cov lus uas Tswv Qhia Tshas hais : “Tsis muaj lwm txoj kev tawm, vim sawv daws raug kev kub ntxhov los ntawm kev sib ntaus rog, tsis muaj leej twg yeej thiab tsis muaj leej twg swb. Txoj kev tawm zoo tshaj, ces yog sawv daws los sib tuav tes tham kom sib nkag siab.” 
Nyob hauv lub rooj sab laj kev thaj yeeb, mas muaj Oos Xas Xus Cis, muaj cov thawj tub rog Mias Mas thiab muaj cov thawj coj ntawm txhua pab neeg uas muaj riam phom tuaj sib sau ua ke. Lawv lub hom phiaj yog sib tham txog nrhiav kev thaj yeeb nyob hauv lub teb chaws. 
Xyoo 1947, muaj lub rooj sab laj Panglong thawj zaug. Lub caij ntawd yog tus thawj tub rog Oos Xas uas yog Oos Xas Xus Civ txiv ua tus kav lub teb chaws Mias Mas thiab zwm rau cov tseem hwv Aas Kiv. Oos Xas pib nrog cov thawj coj nyob hauv 4 pab neeg uas yog cov haiv neeg tsawg sib tham. Tam sim no muaj ntau pab neeg nyob ua sab ua sua rau pem tej toj siab thiab sawv daws txoj kev xav tsis sib thooj, ces thiaj ua rau kev yuav tsa lub rooj sab laj hais txog kev thaj yeeb ntaug zuj zus. Cov teeb meem kub ntxhov nyob Mias Mas teb, yog pib txij hnub uas tub sab nyiag tua Oos Xas Xus Cis txiv tuag 73 xyoos dhau los. Txij ntawd los Mias Mas teb muaj kev sib tawg thiab sib txeeb kav teb kav chaw los txog niaj hnub nyem no. 
Tsis tas li ntawd, niaj hnub no lub teb chaws tseem muaj kab mob Covid-19 ua rau tsoom pej xeem thiab cov haiv neeg tsawg nyob Mias Mas teb kub ntxhov kawg nkaus. 
Tswv Qhia Tshas hais tias : zim txwv no Vaj Qhia Fas Ntshis Kus nqua hu kom tas ntiaj teb tso tseg kev sib ntaus rog, thiab tig los sib koom tes rhuav tshem tus kab mob Covid-19 uas yog ntiaj teb tus yeeb ncuab tam sim no. Thov sawv daws tig los tsim lub neej tshiab thiab ua kom kev lag luam rov vam meej. Txhim kho lub ntiaj teb kom muaj xyoob ntoo nroj tsuag thiab muaj huab cua zoo. Nrog cov kws kho mob sib pab tiv thaiv tus kab mob uas tab tom sib kis nyob thoob ntiaj teb. Yog tias sawv daws mloog Vaj Qhia cov lus thiab sib koom tes, mas kev thaj yeeb yeej yuav muaj tiag. Kev thaj yeeb uas sawv daws xav tau, yog txoj hmoov hais txog sawv daws lub neej yav tom ntej. Lub neej yav tom ntej yuav muaj thiab tsis muaj, yog nyob ntawm sawv daws lub tswv yim thiab txoj kev xav.