Myanmar teb tab tom sib tawg, tab sis Asean hais tias kev txhim kho cov tub ntxhais hluas tab tom zoo zuj zus

Raws kev tshaj tawm lub lis piam tag los, cov tub ntxhais hluas nyob Myanmar pom kev vam meej nyob hauv xyoo 2021 thiab 2022. Xws li thaum muaj tsov rog cov xib hwb qhia ntawv yog tus sawv cev ntawm tseem hwv Myanmar. 

Thaum tsov rog kis mus txog ciam teb, qee lub nroog muaj hoob pob tawg thiab muaj kev ua luam neeg, cov neeg raug nyiag mus nyob ze Suav ciam teb.

Tom qab cov tub rog txeeb teb chaws hnub tim 1 lub 2 hlis xyoo 2021, cov tub ntxhais hluas pib tawm tsam, pib nrhiav kev thaj yeeb thiab tuav riam phom. Lawv tawm hauj lwm, tawm tsis kawm ntawv thiab tawm ntawm lawv tsev neeg mus.  

Ntawv xov xwm zej zog tshaj tias : cov tub rog Myanmar yuav tsum tiv cov haiv neeg uas tuav riam phom nyob hauv lawv thaj tsam, ces 2 tog sau cov tub hluas tuaj sib tua. Ua rau muaj kev siv tshuaj thiab rov tua tus kheej heev zuj zus nyob hauv cov tub ntxhais hluas. Tom qab ib xyoos ntawm lub teb chaws qhib kom muaj vaj huam sib luag, mas muaj kev cia siab txog yav tom ntej me ntsis.

Kev kawm ntawm Asean ua kom pom tias cov tub ntxhais hluas nyob Myanmar muaj kev vam meej kawg nyob hauv fab kev kawm, fab kev noj qab nyob zoo thiab kev nyob kaj siab hauv pab nom tuav kev thaj yeeb (NLD), uas yog Oos Xas Xus Cis ua tus coj. Tam sim no nws raug cov tub rog ntes kaw nyob hauv nkuaj.

Tau txais kev txhawb nqa los ntawm lub Leej Haum Kuj peev nyiaj txiag, cov nom Myanmar qub txhawb nqa kev txhim kho nyob thoob lub teb chaws, vim lawv tau qhib kev rau cov tub ntxhais hluas nyob hauv xyoo 2018. Tab sis kev kawm ntawm Asean hais tias kev txhawb nqa cov tub ntxhais hluas yog tshwm sim nyob hauv xyoo 2021 thiab 2022. 

Raws kev soj ntsuam ntawm lub Leej Haum Kuj, muaj cov neeg tsiv teb tsaws chaw nyob hauv Myanmar teb ze ntawm 2 plhom leej. Nyob hauv cov neeg tsiv teb tsaws chaw ntawd muaj 18 plhom leej xav tau kev pab yam sai nyob hauv lub nroog Des Mos Xos uas nyob sab hnub tuaj hauv lub xeev Kas Yav. Cov neeg tsiv teb tsaws chaw ntawd lawv tau khiav mus nyob pem tej roob thiab nkaum hauv tej hav zoov. Muaj ib txhia nkaum nyob hauv qhov tsua, kom dav hlau txhob tua raug lawv. Cov dav hlau thiab riam phom uas tseem hwv Myanmar siv tua lawv, yog tuaj ntawm Lav Xias teb thiab Suav teb tuaj.