NEEG TUAG VIM ZAUB MOV TSIS HUV NTAU DUA TUAG VIM MOB AIDS.

Nyob hauv lub qab ntuj no mas cov neeg tuag vim noj cov zaub mov tsis huv muaj ntau dua cov neeg tuag vim mob tus kab mob AIDS, npaws yoov thiab mob aws. Yog li thiaj txog caij sawv daws yuav tau nqis tes sib pab txuag tib neeg txoj sia.
Nyob rau xeev ntuj As Xias thiab Pes Xis Fis, mas cov zaub mov tsis huv los ntawm kev muas zaub mov raws ntug kev thiab tej kiab khw muag toob xib noj haus tsis huv. Tsis tas li, cov neeg nyob xeev ntuj no los lawv nyiam noj cov zaub mov ua tsis siav thiab, mas thiaj tsim kev mob rau lawv lub cev.
Yog li yuav daws kho li cas? Cov nom tswv tswj teb chaws yuav tsum tsa tsab cai los siv kom nruj. Cov tuam txhab yuav tsum paub txhawj xeeb txog lwm tus txoj sia, lawv yuav tsum kub siab saib xyuas lawv cov toob xib los zaub mov kom huv. Hos cov pej xeem los yuav tsum quav ntsej txog lawv tus kheej thiab nrhiav kev kawm txog fab kev noj qab haus huv. Mas sawv daws txoj sia thiaj yuav ntev dua no.