NIAM TXIV THIAJ YOG TUS TSIM NYOM HWM THIAB HAWM.

Niam thiab txiv yog tus tseem tswv tiag, yus kav tsij hwm thiab hawm, muab siab rau saib xyuas niam thiab txiv ua ntej txhua yam yuav lig dhau. 
Thaum yus lub pob ntseg lag lawm, mas yus tsis hnov tej me nyuam hais dab tsi, thov kom tej me tub me nyuam tsis txhob nthe thiab cem tias lag ntseg los cas hais tsis hnov. Thov tej me tub me nyuam maj mam rov hais dua, los yog sau ua kab ntawv rau yus nyeem. Niam thiab txiv laus lawm, ces lag ntseg li no ntag.
Thaum yus 2 phab ceg tsaug tsaug thiab sawv tsis taus, vim pob hauv caug tsis zoo lawm. Yuav vam txog tej me tub me nyuam pab hwj yus sawv, zoo ib yam li thaum yus hwj tej me nyuam tseem me uas lawv xyaum mus kev. Cov ua niam ua txiv vam tias tej me tub me nyuam yuav txawj ua siab ntev mloog yus tej lus. Thaum yus pib yws thiab hais tej qub lus, thov kom tej me nyuam txhob luag yus thiab saib yus zoo li ib tug neeg tsis paub qab hau. Tej me nyuam puas nco tias thaum lawv tseem me, lawv quaj hu nrhiav niam nrhiav txiv, taij niam taij txiv tias xav tau ib lub zais tshuab ua si, tej me nyuam hais tag hais dua, qhov kawg niam thiab txiv thiaj yuav rau lawv.
Thov tej me nyuam tsis txhob qias niam thiab txiv tus ntxhiab. Tej me nyuam tsis txhob yuam tej laus da dej, vim tej laus lub cev tsis muaj zog lawm. Thaum cov laus da dej txias txias, mas lawv kheev kheev muaj mob. Thaum tej laus txav mus ze, tej me nyuam yuav tsis sawv khiav. Tej me nyuam puas nco tias thaum lawv tseem yau yau, niam thiab txiv tau khiav raws lawv qab thiab txhom lawv los da dej txhua zaus.
Tej me nyuam yuav nco ntsoov tias : thaum lawv loj hlob lawm, lawv muaj sij hawm ntau. Tsim nyog lawv yuav zaum nrog niam nrog txiv tham ib hnub me ntsis. Vim tej laus tsis xav nyob ib leeg ntsiag to thawm hnub uas tsis tau nrog leej twg tham. Niam thiab txiv yeej paub tias tej me nyuam muaj ntau yam hauj lwm yuav tsum ua, tab sis thov siv sij hawm nrog tej laus tham me ntsis. Tab txawm tsis muaj lus dab tsi tseem ceeb, tsis kav tej me nyuam yuav tsum tau nrog cov laus tham. 
Tej me nyuam puas nco tias : thaum lawv tseem me yau, tej me nyuam muaj ntau yam hais rau tej laus, tej laus tsuas yog teb ws ws, aws aws thiab mloog tej me nyuam cov lus hais. Tej laus muab siab rau mloog txhua yam uas tej me nyuam hais txhua zaus. Thaum pw tej me nyuam nkag mus nrhiav niam thiab txiv lub xub ntiag ntsaub. Li ntawd, vam tias thaum tej niam tej txiv laus thiab muaj mob pw qaug txaj, tej me nyuam yuav saib xyuas thiab tsis nrug tej laus. Tej laus ua txaj ntub thiab ua txaj qias neeg, vam tias tej me nyuam yuav ua siab ntev saib xyuas. Vim tej laus tsis nrog tej me tub me nyuam nyob mus ib txhis. Thaum kev tuag los txog, vam tias tej me nyuam yuav tuav tej laus tes kom tej laus lub siab loj zog. Kev hlub tej laus thiab tsim koob hmoov, muab xam raws li neeg ntiaj teb hais mas yog li no.
Pub nyiaj rau tej hauj sam, tau koob hmoov 50 feem pua. Pub tej yam zoo rau cov neeg uas lawv tsis tau zoo neej, tau koob hmoov 60 feem pua. Pub nyiaj rau cov neeg pluag txom nyem, tau koob hmoov 70 feem pua. Pub rau cov neeg tshaib nqhis noj, tau koob hmoov 80 feem pua. Pub rau niam txiv noj thiab hwm niam hwm txiv, tau koob hmoov 100 feem pua. 
“Npaj zaub mov thiab nyiaj txiag rau tej hauj sam, nkim sij hawm thiab nyiaj txiag. Vim yus xav tau koob hmoov txhawb nqa yus lub neej, ces hauj sam tau noj qab txhua txhua hnub. Tab sis yus tsis nco tias tus tseem tswv uas yus tsim nyog yus teev hawm thiab pe, yog yus niam yus txiv nyob hauv vaj hauv tsev. Yus puas tau daus ib taig zaub mov rau yus niam yus txiv noj ? Niam txiv noj li cas, pw li cas thiab nyob li cas yus puas paub txog ? Muaj qee leej nyob deb niam deb txiv, hu xov tooj mus nug ib hnub ib zaug twb tsis muaj. Tej me tub me nyuam nej yuav tau kub siab thiab muab siab rau txog nej niam nej txiv mog ! 
Ua ntej nej yuav tsis muaj niam tsis muaj txiv nyob hauv lub ntiaj teb no nrog luag hu thiab txhua yam yuav lig dhau. Tsim koob hmoov, pub rau niam thiab txiv noj thiab hwm lawv, yog qhov tsim nyog tej me tub me nyuam yuav tsum ua. 
Yog tej me tub me nyuam txawj hwm niam hwm txiv, lawv yuav nrog luag muaj thiab suab npe yuav nto. Txawm tej me tub me nyuam yuav tsim koob hmoov rau tej hauj sam 1,000 zaug, thiab txhim tej lub tsev teev hawm Phus Thas los sis tsev teev Ntuj loj zoo nkauj, twb zoo tsis cuag pub ib dia mov rau tej niam tej txiv noj. Thov kom tej me tub me nyuam nco ntsoov cov lus no tseg mog !