NRHIAV TSWV NTUJ NYOB HAUV SUAB NKAUJ.

Nkis Laws Mos (Guillermo Esteban) muaj hnub nyoog 25 xyoos, nws nyob hauv lub nroog Mas Ntis. Ib tsoom neeg nyiam mloog nkauj paub nws nyob hauv lub npe Christian Rapper. Vim Guillermo Esteban cov nkauj cav txog Tswv Ntuj nws haum rau cov hluas txheej tshiab. Nws ua li no kuj tsis tau txhais tias nws cov nkauj yuav cav txog Tswv Ntuj thiab nws yuav ua ib tug neeg ntseeg tas mus li. 
Thaum Nkis Laws Mos muaj 17 xyoo, nws tus kwv tau ib tug kab mob hnyav heev. Nkis Laws Mos tau sau ib txoj nkauj thiab hu rau nws tus kwv mloog. Txoj nkauj nws sau nrov thiab nto npe kawg thiab yog thawj zaug uas ua rau muaj suab npe. Tsis ntev mas nws tus kwv tuag thiab nws tu siab tas heev. Nws mus hu nkauj thiab taug txoj kev lom zem. Nws niam pom tias nws tab tom yuam kev, ces nws niam kom nws mus teev Ntuj. Tab sis Nkis Laws Mos tsis kam mus. Nws niam kuj ua siab ntev ntxias, ces qhov kawg Nkis Laws Mos thiaj mus koom teev Ntuj. 
Tom qab teev Ntuj tas, Nkis Laws Mos hais rau nws niam tias : kuv xav paub txog Tswv Ntuj kom zoo dua no. 
Nkis Laws Mos rov mus hauv lub tsev teev Ntuj. Thaum nws mus txog thiab nqis tsheb, txawm muaj ib tug poj niam hu nws lub npe nrov nrov, yog ib tug ntxhais hluas nkauj uas nyiam mloog Nkis Laws Mos cov suab nkauj. Tus ntxhais ntawd caw Nkis Laws Mos mus nrog nws noj ib pluag mov, Nkis Laws Mos tsis xav noj mov, tab sis yog vim nws nyiam tus ntxhais ntawd, ces Nkis Laws Mos thiaj nrog tus ntxhais mus. 
Nkis Laws Mos txoj kev hu nkauj maj mam loj hlob thiab ua rau ib zeej tsoom nyiam kawg. Nkis Laws Mos ib tug phooj ywg yaum kom nws mus hu nkauj cav txog Tswv Ntuj, qhov no thiaj yog thawj zaug ua rau Nkis Laws Mos paub tias nws tab tom nrhiav Tswv Ntuj nyob hauv cov suab hu nkauj. 
Nws tsis ntshai Tswv Ntuj thiab nws qhib siab cav txog Tswv Ntuj. Nws paub tias yog yus ua tsis ncaj thiab ua txhaum, mas Tswv Ntuj yog tus txiav txim. Txij ntawd los Nkis Laws Mos lub siab npuab Tswv Ntuj thiab nws xav tias nws yuav ua cov hauj lwm cav txog Tswv Ntuj. Nws xav tias tej yam nws ua thiab nws cov suab nkauj yog ib qho paj tshab cev rau Tswv Ntuj. Nkis Laws Mos zoo siab uas nws cov suab nkauj tau pab kom tej tus neeg rov muaj kev cia siab, thiab ua rau lawv txawj nco txog Tswv Ntuj cov txiaj ntsim. Zoo li Nkis Laws Mos tab tom tshaj Ntuj Lus nyob hauv nws cov suab hu nkauj ntag.