Omicron thiab Olympic nyob Pej Ceeb

Omicron on Beijing's doorstep Winter Olympics at risk (Asianews photo)

Thursday, February 03, 2022

Tus kab mob COVID-19 tab tom yuav kis nyob hauv kev sib tw Olympic, hauv lub caij ntuj no nyob Pej Ceeb xyoo no. Tus kab mob Omicron pom nyob hauv ib cheeb tsam ntug nroog Pej Ceeb, vim Pej Ceeb tau ua tswv cuab ntawm kev sib tw Olympic nyob hauv lub 2 hlis xyoo 2022 no.

Tseem hwv Suav lub tsev tshuaj xwm kab mob COVID-19, tau txwv tsoom pej xeem Suav li ntawm 20 plhom leej nyob hauv lawv vaj lawv tsev, vim tias lub tsiab peb caug Suav tab tom los yuav txog sai sai no. Xyoo no lub tsiab peb caug Suav yog ncaj rau hnub tim 1 lub 2 hlis 2022.

Cov hauj lwm saib xyuas kev noj qab nyob zoo nyob thoob Suav teb thiaj yuav tsum tuav xam hais txog kev qhib nroog seb lub nroog twg tsim nyog qhib. Tseem hwv Suav siv txoj cai nruj los kav kev sib kis kab mob, kuj yog ua rau txhua yam nyob hauv lub teb chaws nres yuav luag tas, thiab kuj ua teeb meem rau kev sib tw Olympic.

Nyob hauv lub lis piam tag los, hauv lub nroog Sees Tseej muaj cov neeg mob COVID-19 8 leej, ces cov tseem hwv Suav tau muab qee thaj tsam kaw thiab ua rau 12 plhom tus pej xeem yuav tsum raug txwv kaw nyob hauv tsev.

Muaj cov tub sib tw Olympic tuaj ntawm ntau lub teb chaws tab tom tuaj mus rau Pej Ceeb, yog tias tus twg muaj kab mob mas nws yuav tsis muaj cai koom kev sib tw Olympic. Cov neeg tuaj mus saib thiab cov tub ua hauj lwm nyob hauv lub tshav sib tw, los kuj yuav tsum raug soj ntsuam kom zoo.

Nyob hauv lub nroog Pej Ceeb, cov tub ceev xwm yuav tsum soj ntsuam tus kab mob Coronavirus txhua hnub. Cov neeg txawv teb chaws uas lawv xav mus saib, mas txwv tsis pub mus. Tsuas kheev tsoom pej xeem Suav thiab cov txhawb nqa cov tub sib tw nkag mus xwb. Muaj ntau tham chaw ncig tsham, mas yuav raug kaw tseg mus txog hnub tim 30 lub 3 hlis. Qhov no kuj yog ib qho teeb meem cuam tshuam txog kev lag luam nyob hauv lub teb chaws loj kawg thiab.