TAUV HUAB ME ME THIAB TSOB NTOO LAUS

Tsob ntoo laus taij dej ntawm tauv huab me me, kom tauv huab tso dej los ywg tsob ntoo laus. Tab sis tauv huab teb tias : nws muaj dej tsawg heev, ntshai tsam dej tsis txaus ywg tsob ntoo. 
Hnub tom qab los tauv huab kuj hais tib yam li qub thiab. Vim li ntawd, tauv huab me me thiaj xav tias nws yuav maj mam khiav mus ntxiv tom ntej, kom tau khaws dej ntau ntau cia, thiaj muaj dej txaus ywg tsob ntoo. Tauv huab me me yuav khaws kom tau dej txaus ywg tsob ntoo, nws mam rov qab los. Tiam sis thaum tauv huab me me rov qab los txog, nws pom tsob ntoo laus qhuav thiab tuag lawm. 
Thaum tauv huab pom tias tsob ntoo tuag lawm, mas nws quaj thiab hais tias : ua cas nws txoj kev uas maj mam khaws dej yuav tsis muaj nqis li. 
Ces ib tug txiv neej zaum nyob hauv qab hauv paus ntoo thiaj tsa muag nuam, thiab hais rau tauv huab me me tias : “Yog yus yuav muab ib yam dab tsi rau tus yus nyiam, mas yus tsis txhob tos kom muaj txaus tso yus mam muab. Yus cia li muab raws li qhov yus muaj, ces tus uas tau txais nws twb zoo siab lawm. Qhov uas yus yuav ua ib yam dab tsi es yus xav tias maj mam, mas nws zoo kawg thiab, tab sis nws siv sij hawm ntev. 
Yog yus hlub ib tug neeg twg, yus txhob tos kom yus muaj txaus tso. Vim lub sij hawm uas yus tos ntawd, yuav ua rau tus yus hlub tsis muaj sij hawm tos yus.
Ua ntej tsob ntoo laus yuav tuag, mas tsob ntoo muab lus kom kuv hais rau koj hais tias : yog kuv pom koj rov los txog, mas kom kuv hais rau koj tias tsob ntoo laus nyiam koj heev.”
Thaum tauv huab me me hnov cov lus ntawd, mas nws quaj kua muag poob dawb vog rau tsob ntoo laus uas twb tuag lawm. Vim tsis muaj hnub uas tsob ntoo laus ntawd yuav rov hlav nplooj ntsuab xiab rau tauv huab me me pom ntxiv mus tag ib sim neej. 
Zaj lus no yog ib zaj lus zoo pab txhawb peb lub tswv yim kom txawj xav. Cov lus no yog ib tug tub ua yeeb yam hu ua Ntsov Khos Lis (George Collins) sau tseg hnub tim 11 lub 9 hlis xyoo 2001. 
Hnub tim 11 lub 9 hlis xyoo 2001, yog xyoo uas Npis Las Dees tso neeg tua tseem hwv As Mes Lis Kas lub tuam tsev World Trade. Thaum ntawd George Collins hnov tias nws poj niam tuag nrog lub tuam tsev ntawd, ces nws thiaj sau cov lus no tseg.