TAWM TSAM HAIS TXOG FLOYD TXOJ KEV TUAG.

Hnub tim 25 lub 5 hlis 2020, Floyd raug tub ceev xwm xuas hauv caug tais caj dab, nws ua tsis taus pa, ces nws tuag. Cov teeb meem no ua rau cov neeg tawv dub nyob As Mes Lis Kas teb tsis txaus siab, ces thiaj muaj kev sib tawm tsam tiv cov tseem hwv nyob thoob As Mes Lis Kas teb los txog niaj hnub nyem no. 
Kev sib tawm tsam taij thov kev ncaj ncees ntawm cov haiv neeg tsawg uas tawv nqaij sib txawv, mas kuj muaj cov Hmoob koom nrog thiab. Vim tias nyob hauv 4 tug tub ceev xwm uas ua rau Floyd tuag, muaj ib tug yog Hmoob hu ua Tub Thoj. Kev sib tawm tsam yog nyob hauv lub nroog Mes Nis As Pos Lis, lub xeev Minnesota. 
Muaj ib tug poj niam Hmoob hu ua Ntsuab Vaj, nws tus tub raug tub ceev xwm tua tuag xyoo 2006. Nws kuj koom nrog cov As Mes Lis Kas tawv dub tawm tsam tiv cov tub ceev xwm thiab cov tseem hwv. Ntsuab hais tias : kev tsis ncaj ncees thiab kev tu siab thaum nws tus tub raug tua tuag, mas tsis muaj leej twg nkag siab txog. Tab sis nws nkag siab txog Floyd tsev neeg thiab lawv txoj kev tu siab, nrog rau lwm cov tsev neeg uas lawv ntsib cov teeb meem zoo ib yam li no. Ntsuab hais ntxiv tias : thaum cov Hmoob nyuam qhuav tuaj txog teb chaws As Mes Lis Kas, mas muaj qee leej Hmoob raug teeb meem ntxub ntxaug los ntawm cov neeg tawv dub heev kawg. Tab sis kev phem kev tsis zoo yeej muaj nyob hauv txhua haiv neeg uas tawv nqaij sib txawv. Peb yog Hmoob thov kom peb hlub Hmoob xwb zoo lawm.