TEJ YAWM TSHIAB UAS COV HAUJ SAM THAIB TAM TOM NTSIB

Xov xwm tshaj tias muaj 3 tug poj hauj sam Phus Thas raug ntes thiab raug lub txim tias ntxias noj tsoom pej xeem Thaib ntau pua leej txhiab nyiaj. Qhov uas cov poj hauj sam raug ntes, yog vim muaj 400 tus pej xeem mus kom rau cov tub ceev xwm tias; cov poj hauj sam ntawd ntxias kom lawv koom tso nyiaj uas yog tau paj zoo siab thiab zoo heev, tab sis qhov kawg tsis tau raws li sawv daws cog lus. 3 tug poj hauj sam ntawd hnub nyoog 49, 45 thiab 31 xyoos. Lawv 3 leeg tau ntxias tsoom pej xeem nyiaj li ntawm 10 plhom npaj raws li cov tub ceev xwm hais. 
Cov poj niam hauj sam ntawd tsis lees lawv lub txim raws li cov tub ceev xwm hais, lawv hais tias cov nyiaj lawv sib sau ua ke yog yuav coj mus tsim koob hmoov pab cov neeg txom nyem, lawv cog lus tias lawv yuav them cov nyiaj rov qab kom tag rau tsoom pej xeem uas tau pab nyiaj rau lawv. 
Tus poj hauj sam hu ua Us uas yog tus poj hauj sam laus tshaj cov thiab nws yog tus thawj coj ntawm cov poj hauj sam hauv lub tsev teev hawm coj ua kev ncaj ncees, nyob hauv lub xeev Nakhonphanum hais tias cov neeg uas tso nyiaj rau lawv mus nqes peev thiab yws taus, mas yog cov siab hlob xav tau nyiaj ntau. Cov nyiaj ntawd tsim nyog ntsia pom txog cov pab nyiaj thiab lawv yuav tau txais koob hmoov los ntawm cov pab nyiaj. 
Tas cov poj niam hauj sam lawv yog cov chais plaub hau thiab hnav cov khaub ncaws poj niam hauj sam uas muaj lub cim ua lag luam, yog cov tsoom pej xeem Thaib teev hawm Phus Thas hwm. Hais txog kev ntxias noj cov nyiaj luag tej pab tuaj thiab cov nyiaj nyob hauv lub tsev teev hawm, mas yog ib yam xwm yeem nyob thoob Thaib teb uas muaj 41,000 lub tsev teev hawm. Yog 95 feem pua ntawm tas tsoom pej xeem Thaib 69 plhom leej neeg teev hawm Phus Thas. Txhua yam hauj lwm ua kom tau nyiaj ntau, mas yog ib qho teeb meem rau tus tuav nyiaj txiag nyob hauv txhua lub tsev teev hawm thiab yuav tsum tau ua ncaj ncees siab dawb paug. Tab txawm tus thawj poj hauj sam tsis kam lees, tsis kav yog kev xam nyiaj tsis xyuam xim mas kuj yog ib qho yooj yim rau cov neeg xav ntxias cov tsev teev hawm tej nyiaj txiag ua nws tug.