THAIS VAS TEB TOS TXAIS DAS LAIS LAS MAS.

Cov tseem hwv Thais Vas hais tias : qhov uas lawv qhib qhov rooj tos txais tus Das Lais Las Mas tuaj ntawm Tis Npes teb tuaj, mas ua rau cov tseem hwv Suav tsis txaus siab, vim cov tseem hwv Suav hais tias Das Lais Las Mas yog tus yuav ua kom Suav teb ntxhov thiab tawg ua ntau lub teb chaws. 
Das Lais Las Mas tau mus tsham Thais Vas teb zaum kawg yog xyoo 2009, uas yog 11 xyoos dhau los lawm. Lub caij ntawd yog Tsaij Is Is ua Txoov Tim Tswv kav Thais Vas teb. Das Lais Las Mas tau hais nyob hauv nws lub Tsev Vas (Website) tias : “Tab txawm txhua yam yuav hloov, tsis kav kuv yuav rov tuaj tsham koj nyob Thais Vas teb ib zaug ntxiv. Txawm yuav muaj dab tsi tshwm sim, los kuv yuav nyob rawv hauv koj lub siab”. 
Joanne Ou uas nws yog Thais Vas tus pwm tsav txawv teb chaws kuj hais tias : cov tseem hwv Thais Vas tsis tau hnov ib tug neeg taij tias yuav thov nkag mus Thais Vas teb. Tab sis yog leej twg nkag mus Thais Vas teb, mas tseem hwv Thais Vas yuav qhib qhov rooj tos txais raws li txoj cai uas muaj tseg cia. Yuav ua raws txoj cai kev sib hwm ntawm 2 tog, ces lawv zoo siab tos txais Das Lais Las Mas mus tsham Thais Vas teb ib zaug ntxiv. 
Qhov no ua rau cov tseem hwv Suav nyob Pej Ceeb ua xyem xyav txog Thais Vas tus Txoov Tim Tswv, vim ntseeg tias tus Txoov Tim Tswv Thais Vas yeej yuav hloov kom Thais Vas teb ua lub teb chaws twj lij. 
Xyoo 1959, Das Lais Las Mas tau khiav mus nkaum nyob Is Ntias teb, vim lub caij ntawd Suav teb muaj kev sib tawm tsam loj. Xyoo 1989, Das Lais Las Mas tau txais lub txiaj Nos Npes ntawm kev thaj yeeb. Cov tseem hwv Suav thiaj hais tias Das Lais Las Mas yog tus ua kom kev teev hawm nyob Suav teb sib tawg. Tab sis Das Lais Las Mas hais tias qhov nws ua, yog xav kom muaj kev twj lij nyob hauv nws lub zos Him Mas Lais xwb.