THAUM LAUS LEEJ TWG YUAV YUG?

Muaj ib tug poj niam hu ua Kab. Nws ua poj ntsuam los ntau xyoo lawm. Kab yog ib tug xib hwb qhia ntawv. Nws tu nws tus tub loj hlob thiab ua neeg mloog lus. Ces Kab thiaj muab nws tus tub xa mus kawm ntawv nyob As Mes Lis Kas teb. Tom qab Kab tus tub kawm tiav, mas nws muaj hauj lwm ua, yuav vaj yuav tsev thiab yuav poj niam. Kab tus tub ua lub neej xws luag thiab nkawd muaj ib tug me nyuam. Kab thiaj xav hais tias : yog thaum twg nws laus thiab tsis ua xib hwb qhia ntawv lawm, nws yuav mus nrog nws tus tub tus nyab ua neej nyob As Mes Lis Kas teb rau yav laus. Ua ntej 3 lub hlis uas Kab yuav so laus thiab tsis ua xib hwb qhia ntawv lawm, mas Kab sau ib tsab ntawv mus rau nws tus tub. Kab hais tias muaj me tub me nyuam, thiaj muaj neeg saib xyuas rau yav laus. Tam sim no Kab tus tub ua neej tsheej neeg lawm, tej neeg zej zog tus qhuas kuj muaj, tus khib kuj muaj. Thaum Kab tab tom tos nws tus tub tsab ntawv teb, mas Kab xav tias yuav muab tsev muag thiab npaj tias nws tej hauj lwm yuav ua li cas. Tab sis hmo kawg ntawm Kab yuav so laus tsis ua xib hwb qhia ntawv lawm, mas Kab tau txais nws tus tub tsab ntawv teb. 
Nyob hauv lub hnab ntawv muaj ib tsab ntawv thiab ib daim Check 30,000 dos las. Kab poob siab nthav thiab xav tias ib sim neej nws tus tub tsis tau xa nyiaj rau nws ntau npaum no. Kab leej maj muab tsab ntawv nthuav los nyeem, ua cas nws tus tub sau tias : 
“Niam ! Nyab wb tau sib tham lawm, wb tsis pom zoo koj tuaj nyob teb chaws no. Yog xam tej nqi zog koj tu kuv loj hlob, mas kuv yeej tshuav koj nuj nqis. Tab sis kuv muab xam los lawm, koj tej nqis zog tu kuv loj hlob tsuas nyob li ntawm 20 tawm txhiab dos las xwb. Kuv txhab ib qho ntxiv ua 30,000 dos las xa los rau koj. Vam tias koj yuav tsis sau ntawv tuaj rau kuv ntxiv lawm.”
Kab nyeem tsab ntawv tag, nws kua muag poob nthav. Kab tu siab txog qhov nws ua poj ntsuam thiab raug tso tseg nyob ib leeg tas li. Ntshe nws yuav nyob tab seeb mus txog hnub nws laus tuag tsis muaj neeg saib xyuas. Nws chim siab tsis xav ua neeg nyob ntxiv. Kab vam txog cov lus nyob hauv Ntawv Ntshiab los pab nws, ces Kab thiaj xav tau tswv yim tias : nws yuav muab 30,000 dos las ntawd coj mus ua si ncig teb chaws. Kab tau mus pom tej yam tshiab tshiab, tau pom tej yam tsis tau pom dua nyob hauv nws lub neej. Nws muaj kev zoo siab, nws thiaj rov sau ib tsab ntawv mus rau nws tus tub tias : 
“Me tub ! Koj tsis xav kom niam sau ntawv tuaj rau koj lawm, tab sis thov kom koj xav tias tsab ntawv no yog tsab ntawv txuas los ntawm tsab kawg. Niam tau txais koj cov nyiaj lawm, thiab niam muab cov nyiaj ntawd coj mus ncig teb chaws. Thaum niam tab tom mus ncig teb chaws, mas niam pom tias tsim nyog niam yuav ua koj tsaug. Vim muaj koj ua rau niam pom ntau yam tshiab tshiab thiab xav tau ntau yam tuaj. Lub neej yav tag los, niam hnov qab tag lawm. Niam paub tias kev hlub ntawm ib tse neeg, ntawm tej phooj ywg los yog ntawm tus neeg yus hlub kuj xij. Txhua txoj kev hlub tsis muaj cag ruaj khov thiab nws hloov tau txhua lub sij hawm. Yog tias hnub no niam tseem tsis thim xav, tseem xav li qub, mob siab li qub, ntshe niam twb tuag rau nrab xyoo lawm. Koj cov lus teb tsis kam txais niam tuaj nrog nej nyob, ua rau niam paub tias : yog muaj hmoo, ces yeej tau sib ntsib xwb. Yog tsis muaj hmoo, ces txawm yuav ua li cas los yeej tsis tau sib ntsib. Txhua yam nyob hauv lub ntiaj teb no tsis muaj ib qho tseeb, tsis muaj ib qho ruaj khov. Niam nkag siab txog txhua yam thiab txawj tswj niam tus kheej kom nyob tus lawm. Txhua txoj kev xav niam xav mus rau qhov zoo xwb. Txawm tias niam tsis muaj koj, niam kuj tsis muaj dab tsi ua chaw khuam siab. Niam nyob ib leeg los niam yeej nyob tau.”
Niam thiab txiv txhua leej txhua tus yeej xav muab tej yam zoo zoo rau lawv cov me nyuam xwb. Tab sis tej yam uas lawv tau txais rov los, tsis yog yam uas zoo raws li lawv lub siab xav. Muaj ib lo lus hais tseg tias : “Niam thiab txiv lub tsev, yog me nyuam lub tsev mus tag ib sim. Tab sis me nyuam lub tsev, tsis yog niam txiv lub tsev. Tu tub tu kiv, yog niam thiab txiv txoj hauj lwm. Kev saib xyuas me nyuam, yog yam tsim nyog ua. Kev yuav vam txog me nyuam, yog zoo li xav yuam kev.” 
Me nyuam txhua tus, tsis yog yuav zoo li tus peb tham nyob hauv zaj no. Thov kom cov niam cov txiv nco ntsoov tias : 
“Yus laus lawm, tsis txhob cia siab thiab vam txog tej me nyuam ntau dhau.”
Yus laus lawm, yus yuav saib yus tus kheej kom zoo, yog qhov zoo tshaj. Yog me nyuam txawj nco niam txiv txiaj ntsig, lawv yeej yuav txawj hlub txawj pauj. Yog me nyuam tsis nco niam txiv txiaj ntsig, niam txiv yuav quab yuam lawv tsis tau thiab yuav tsis muaj ib qho pauj rov rau yus. Niaj txhis piv txoj lus hais tias : 

“Cog qoob cog loo los npaj tshaib, tu tub tu kiv los npaj laus”. 

Muaj me tub me nyuam, thiaj muaj neeg saib xyuas yus rau yav xaus.