Thawj txoj kev tsheb nqaj hlau qab npoo av nyob Hanoi

Lub tuam ceeb Hanoi nto npe tias yog ib lub nroog uas muaj tsheb Motor ntau tshaj plaws, vim li ntawd cov tseem hwv thiaj npaj ua kom cov pa roj tsheb muaj tsawg zuj zus. Cov tseem hwv thiaj tso neeg txhim 9 txoj kev tsheb nyob hauv xyoo 2030. Thawj txoj kev tsheb nqaj hlau khiav hauv qab npoo av nyob hauv nroog Hanoi uas yog siv cov tsheb nqaj hlau ua nyob Suav teb twb tau qhib khiav lawm.

Tam sim no muaj tshaj 5 plhom lub tsheb Motor khiav nyob hauv lub nroog Hanoi, thiab txij no mus txog xyoo 2030 yuav txhim 9 txoj kev tsheb ntxiv. Cov tseem hwv ua li ntawd vim yog xav ua kom cov pa roj tsheb nyob Hanoi muaj tsawg me ntsis, vim Honoi nto npe tias muaj tsheb Motor ntau thiab muaj pa roj ces huab cua tsis zoo.

Vim kev txhim kho qeeb thiab peev nyiaj txiag 2 npaug ntawm kev txhim kho, mas thiaj ua rau txhua yam mus qeeb. Thawj lub tsheb nqaj hlau khiav hauv qab npoo av yog khiav ntawm lub tshav tsheb Cat Linh nyob ze plawv nroog, thiab txoj kev tsheb yog 13 km. Khiav ntawm Cat Linh mus rau Ha Dong uas nyob sab hnub tuaj hauv lub teb chaws.

Nguyen Thi Thu hais tias : “Kuv txiav txim siab ua, vim kuv ua xyem xyav, kuv muaj kev sov siab heev uas kuv tau caij tsheb tom qab txhua yam tsis raws siab xav”. Kev ua kev tsheb nqaj hlau no siv sij hawm lawm ib tiam neeg thiaj tiav. Qhov ua tau qeeb kuj yog vim kev ruaj ntseg thiab peev nyiaj txiag. Ua rau kev siv peev nyiaj txiag thaum teeb tseg yog 476 plhom, ces thaum kawg yog 780 plhom Euro.

Hanoi muaj tsoom pej xeem nyob li ntawm 9 plhom leej, thiab yog qhov ntiaj teb paub tias cov tsheb Motor coob coob sib txiv qev thiab ua rau neeg sib cav sib ceg heev kawg, tsis tas li ntawd kuj tseem muaj teeb meem tsheb sib nraus thiab tsheb nrau neeg. Xyoo 2008 muaj cov tsheb Motor khiav ntawm kev tsheb kwv yees 2 plhom lub, tab sis nyem no yog 5.7 plhom lub tuaj. Hos cov tsheb loj muaj li ntawm 185,000 lub xwb, nyem no kuj muaj txog 700,000 lub lawm.

Cov tsheb Bus thauj neeg nyob hauv nroog, mas tsuas muaj tsoom pej xeem 1 feem 5 siv xwb. Txawm li cas kuj xij, pom tias teeb meem tsheb ntau yog ib qho ua rau huab cua tsis zoo kiag.