TSEV NEEG HNUB

Lub cuab yim neej tsis yog qhov tseem ceeb, tab sis nws yog txhua yam.
Tsev neeg hnub yog lub Leej Hauj Kuj (UN) txhim tsa nyob hauv xyoo 1994 hnub tim 15 lub 5 hlis. Lub Leej Haum Kuj tsa tsev neeg hnub, kom tib neeg tau ua kev nco txog qhov tseem ceeb hauv yus tsev neeg, vim tsev neeg yog tus cag ntawm ib zeej tsoom. 
Lub caij sib sau ua ke heev tshaj, mas yog lub caij yus siv sij hawm nrog tsev neeg nyob, ces yus thiaj ntsia pom tias cov neeg hauv yus tsev neeg tseem ceeb tshaj plaws rau yus. Tsev neeg hnub, kuj yog ib lub zoo caij rau cov yim neeg ntseeg Kav Tos Liv kom rov sib hlub xws li txoj kev hlub tuaj ntawm Tswv Ntuj lub siab tuaj. Dhau ntawm peb txhua leej txhua tus txoj kev thov Ntuj thiab teev Ntuj nyob hauv tsev teev Ntuj lawm, peb tseem yuav sib sau thov Ntuj nyob hauv peb tsev neeg thiab. 
Lub neej ua neeg ntseeg, yog kev nqua hu kom peb muaj feem cuam nyob ua ke. Cov yim neeg ntseeg yog lub tsev kawm qhia hais txog kev hlub, qhia txog kev nyiam Tswv Ntuj thiab kev rov sib nyiam sib hlub kawg siab kawg ntsws. Kev sib txheeb sib swm hauv yus tsev neeg, yog lub hom phiaj uas Tswv Ntuj qhia kom peb ua, peb thiaj pom tias cov hauj lwm niaj lis piam nyob hauv peb tsev neeg mas yog qhov tseem ceeb tshaj. Nyob hauv peb tsev neeg, peb muaj kev sib tham, kev sib fim nyob ua ke. Peb muaj lub caij ua hauj lwm thiab sib pab, muaj lub sij hawm los teev Ntuj ua ke xwm yeem.