TSOOM PEJ XEEB THAIB TSIS KAM TXAIS COV NEEG MIAS MAS

Cov Pas Kas Yos uas lawv hla tus niam dej Salavin mus rau Thaib teb, mas lawv xav thov ua neeg thoj nam nyob Thaib teb, vim cov tub rog ua nruj ua tsiv rau lawv. Tab sis cov tseem hwv Thaib thov kom lawv tawm ntawm Thaib teb hauv lub xeev Maehongson rov mus Mias Mas teb.
Zim txwv no muaj ntau txhiab tus neeg Pas Kas Yos tab tom khiav tawm teb chaws, vim kev tsov rog thiab lawv xav nrhiav kev nyob nyab xeeb, ces lawv thiaj khiav tawm Mias Mas teb mus rau Thaib teb. Tab sis tsoom pej xeem Thaib tsis pom zoo txais cov neeg Mias Mas kom coob coob. 68 feem pua ntawm cov neeg teb cov lus nug, hais tias cov neeg thoj nam Mias Mas yuav ua rau tus kab mob sib kis ntxiv. 62 feem pua hais tias cov neeg thoj nam Mias Mas yuav ua rau cov pej xeem Thaib poob hauj lwm. Hos 54 feem pua hais tias yog txais cov neeg thoj nam Mias Mas coob coob, mas yuav ua kom muaj kev kub ntxhov yam li ; muaj tub sab tua neeg, muaj tub sab nyiag ub nyiag no nyob hauv tsoom pej xeem Thaib.
Tsoom pej xeem Thaib ntsia pom cov neeg thoj nam uas lawv tawv ncauj tsis kam rov qab, mas lawv txhawj xeeb kawg. Vim lawv ntshai kev sib kis tus kab mob Covid-19 uas tshwm sim zaum 2. Cov tseem hwv Thaib kuj hais txog tus kab mob sib kis thawj zaug uas cov pej xeem Mias Mas tsis mloog lus, lawv tau nyiag kev hla 2 lub teb chaws tus ciam teb, ua rau neeg muaj mob coob kawg. Tus kab mob kis loj nyob Thaib teb, kuj yog vim cov tub zog Mias Mas uas lawv nyiag kev mus ua hauj lwm nyob hauv cov tuam tsev tsim toob xib nyob Bangkok thiab nyob ib puag ncig.