Tsoom pej xeem ib vam tawm leej khiav tawm hauv Sam (Shan State), nyob Mias Mas

Cov tub rog Mias Mas tau ntiab tsoom pej xeem hauv lub xeev Shan uas nyob Mias Mas qab teb kom tawm hauv lawv tej vaj tse mus. Yog raws li xov tooj cua Radio Free Asia tshaj tawm.

Muaj tsoom pej xeem li ntawm 30,000 leej nyob hauv 30 lub zos hauv lub nroog Depayin thiab 10,000 leej nyob hauv 20 lub zos, hauv lub nroog Pekon lub xeev Shan. Kom tsoom pej xeem khiav mus nkaum rau lwm qhov chaw, vim cov tub rog Mias Mas tau mus tshawb zej zog hnub tim 8 thiab tim 9 lub 11 hlis tag los.

Xov xwm hais tias muaj li ntawm 50 lub zos yog qhov chaw nruab nrab ntawm kev tiv cov tseem hwv txoj kev kav teb chaws. Cov tub rog Mias Mas tau nrog cov ntxeev siab sib tua raws tus ciam teb uas nyob tsis deb ntawd. Yog ib zaug uas cov tub rog ntiab tsoom pej xeem tawm hauv zos mus, suav txij li thaum cov tub rog txeeb teb chaws lub 2 hlis xyoo no.

Xov xwm tshaj tias cov tub rog Mias Mas tau nkag mus hauv ntau lub zej zog thiab ntes tsoom pej xeem hlawv lawv tej vaj tsev. Cov tub rog Karen hais tias : lawv tuaj yeem siv tshuab tsom ntsia pom tej xwv txheej ntawd. Thiab pom lub sij hawm cov tub rog Mias Mas tab tom hlawv tsoom pej xeem tej vaj tse.