TUS NEEG TAWV DUB TUAG NYOB NYUS YOS.

Daniel Prude uas nws muaj 41 xyoos, nws raug cov tub ceev xwm ntes thiab xuas kaus mom looj taub hau kom nws ua tsis taus pa, ces nws thiaj tuag. Cov teeb meem no yog tshwm sim nyob hauv lub 3 hlis xyoo no. Muaj cov tshuab thau duab nyob ntawm ntug kev thau duab pom tias : tus txiv neej tawv dub ntawd raug cov tub ceev xwm ntes thiab lawv xuas ib lub kaus mom plaub looj nws taub hau, cov tub ceev xwm yuam nws khoov rau hauv av ntev li 2 feeb, ces nws thiaj vau vim nws ua tsis taus pa. Tom qab ntawd ib lis piam tus txiv neej tawv dub ntawd thiaj tuag nyob hauv tsev kho mob. Tus txiv neej tawv dub ntawd hu ua Prude, muaj 5 tug me nyuam lawm. Nws tsev neeg thov kom muab cov duab uas lub tshuab thau tau coj los saib, lawv pom Prude khiav liab qab raws txoj kev tsheb, thiab pom cov tub ceev xwm tuaj ntes nws. Prude hais tias nws yog ib tug neeg mob Covid-19, thiab nws nto qaub ncaug. Cov tub ceev xwm muab nws 2 sab tes sib khawm rau saum taub hau. Cov tub ceev xwm kom Prude txhob nto qaub ncaug lawm. Lawv muab ib lub kaus mom ntaub los looj nws tau hau thiab kom nws khoov rau hauv pem teb, ua rau Prude ua tsis taus pa thiab nws vau. Cov tub ceev xwm coj Prude mus hauv tsev kho mob, cov kws kho mob pab Prude xeev rov los nyob tau 1 lis piam, ces nws tuag. Prude tuag ua ntej 2 lub hlis, ces George Floyd mam tuag. George Floyd txoj kev tuag thiaj yog lub cub tawg ua kom cov neeg tawv dub tsis txaus siab thiab muaj kev sib sau tawm tsam mus thoob As Mes Lis Kas teb thiab nyob ntau lub teb chaws. George Floyd tuag lub 5 hlis, yog vim nws raug cov tub ceev xwm ntes thiab xuas hauv caug tais nws caj dab rau hauv pem teb ntev li 8 feeb. Tsis ntev los no, kuj muaj ib tug txiv neej neeg tawv dub hu ua Jacob Brake raug cov tub ceev xwm xuas phom tua nws nrob qaum 7 phom. Jacob Brake tsis tuag, tab sis nws ua neeg tuag duav lawm. Cov tub ceev xwm tua Jacob Brake li ntawd, mas hnub tim 9 lub 9 hlis no, cov Tswv Qhia As Mes Lis Kas thiaj thov kom tsoom neeg ntseeg sib koom thov Ntuj thiab yoo mov ua koob hmoov rau Jacob Brake, kom sawv daws nco ntsoov tias neeg txoj sia muaj nqis. Tab txawm Jacob Brake yog ib tug neeg tawv dub, tsis kav sawv daws yog Tswv Ntuj me nyuam thiab tsim nyog txhawb lub dej siab pab cov neeg tawv dub kom lawv muaj zog tiv thaiv ntxiv mus.