TUS NTSHIAB HUV LUB QHOV ROOJ TOM NTEJ

Lo lus hais tias “tus ntshiab huv lub qhov rooj tom ntej”, mas yog ib lo lus uas leej twg nyeem los nyiam heev. Tsis yog tias zoo mloog los zoo nyeem xwb, nws tseem yog ib lo lus xaus nyob hauv Vaj Qhia Fas Ntshis Kus phau ntawv ntuas neeg lub siab hu tias : “Zoo siab hom khaj”. Nws twb tau tawm nyob hauv cov ntawv Thaib rau sawv daws saib lawm. Duab tshav ntuj ntab ntuas thiab maj maj nrug deb zuj zus, qhov tsaus ntuj pib npog tas qhov txhia chaw. Tej teeb hluav taws xob cig qauj zuj zus, zoo li txhua yam raug txiav tu tas. Tej xov tooj tsis muaj paj cua sib hu tsis tau, ua rau yus ntsia pom tej me nplooj xyoob nplooj ntoos co laim txias, huab khiav rwv zws, me suab kab thiab suab dej ntws nrov zom zaws, qhov kawg hauv tej zej zog nyob tsaus ntuj nti dub nciab. Ces yus pib taws tswm ciab, tswm ciab ua kom yus pom lwm tus neeg lub ntsej muag ploj loog, pom tsis tshua tseeb, ua rau yus lub siab muaj tej lo lus nug tias : “Yam twg uas yus cheem tsum muaj thiab yuav tu ncua tsis tau ?”

Tab sis hnub ntawd, lub tswb ntawm tsev teev Ntuj nrov tuab ntws, cov neeg ntseeg sawv daws puav leej mus ua thaj txi Ntuj, pom tej me nyuam khiav zom pes zaws. Cov tub ntxhais hluas zaum ua tsheej pawg thiab muaj qee leej khawm tes ruaj. Cov pog laus yawg laus luag qhov ncauj rua u, thaum lawv pom ib tug neeg txawv ntsej muag tuaj. Nyob hauv tsev teev Ntuj muaj Txiv Plig ua tus coj lub thaj txi Ntuj, lub suab nyeem ntawv Moo Zoo nrov nchas ntws hnov tseeb kawg. Ntawv Ntshiab raug siab thiab zoo pab xav tswv yim, muaj neeg sib ntxhi tias yam twg ntshiab huv dua ?

Txawm li ntawd tsis kav, peb yuav tsis ua xyem xyav txog Vaj Qhia Fas Ntshis Kus lo lus uas nws hais txog yam ntshiab huv nyob rau lub ntuj tam sim no. Vaj Qhia hais tias : “Txiv vam hais tias ; cov lus kawg uas txiv tseg nyob hauv tsab ntawv qhia neeg lub siab no, yuav muaj txiaj ntsim qab hau rau lub Koom Txoos qhib kev rau nyias tus kheej tau cev nyias tus kheej rau Tswv Ntuj. Kom nyias tau ua tej yam uas nyias xav mus rau txoj kev ntshiab huv, thiab peb sawv daws yuav tau sib koom siab ua tiag tiag. Peb yuav faib txoj kev sib nyiam sib hlub uas tsis muaj leej twg yuav nqa mus tau. Yog muaj ib tug neeg twg nug yus tias : yam twg yog yam tseem ceeb tshaj uas koj xav tau ? Mas yus yuav teb tias yam ntawd yog txoj kev sov siab thiab kaj siab. Yog ho muaj dua lwm tus nug tias : yam dab tsi uas ntshiab huv tshaj ? Mas yus yuav teb tias txoj kev sov siab thiab kaj siab nyob hauv lub cuab yim neej. Vim li ntawd, peb yuav tsum zoo siab mus taug txoj kev ntshiab huv nyob rau tam sim no. Kev kaj siab thiab sov siab nyob hauv lub cuab yim neej uas tsis muaj leej twg nqa mus tau, mas muaj nyob rau lub qhov rooj tom ntej, koj yuav nkag mus tshawb fawb tau. Lub ntiaj teb zim txwv no muaj ntau yam teeb meem tshwm sim tshiab tshiab, tsis hais nyob hauv lub Koom Txoos los sis lwm qhov. Txhua yam teeb meem no coj kom neeg mus deb ntawm lub Koom Txoos. Ces ua rau neeg haj yam ncaim mus deb ntawm txoj kev ua zoo thiab ncaj ncees, uas yog neeg lub hom phiaj ntawm kev nyob ua tsheej pab tsheej pawg. Vaj Qhia Fas Ntshis Kus tau hais txog cov teeb meem no ntau zaus thiab rub kom sawv daws tig los taug txoj kev zoo thiab ncaj ncees, txoj kev ua zoo thiab ncaj ncees nyob tsis deb ntawm peb txhua leej txhua tus. Kev ntshiab huv tsis tau hais tias yog cov Leej Ntshiab ntiag tug. Yog cov neeg nyob ze yus uas lawv nrhiav txoj kev ua zoo. Kev ntshiab huv yog ib yam nyob ze yus heev, yus yuav siv zog mus kom txog. Yog tias yus xam pom thiab mus txog lawm, mas txoj kev ntshiab huv ntawd yuav ua kom yus muaj kev sov siab  thiab kaj siab lug.