TXHOB MUAJ KEV SIB NRAUJ

Kev ua lub neej kom muaj ib pab tub ki, muaj vaj muaj tse, muaj lub cuab tam ruaj ntseg; mas tsis yog qhov npau suav. Yog ib qho yus yuav tsum pom tseeb txog txhua yam yus lub neej yuav ua mus yav tom ntej.

Yus yuav txhob niaj hnub nrhiav kev ua si kev lom zem rau yus, kom zoo yus siab xwb. Tus sawv ntawm yus ib sab, mas tsis nco txog nws li lawm. Zoo li yus saib nws yog tus me nyuam yaus uas tsis tau paub tab xwb. Yus ua dab tsi, yus yeej tsis ntshai nws kiag. Qhov no mas peb tsis ua raws li kev hwm Ntuj hwm neeg.

Yus yog txiv neej los yog tus poj niam, yus yuav ua li cas thiaj paub hwm yus tus txij nkawm? Yus xub nco txog Ntuj ua ntej tso, saib Ntuj saib wb zoo li cas. Vim Tswv Ntuj nyob hauv wb ob leeg: ib tug xav ua phem rau ib tug tsis tau vim Ntuj nyob hauv wb.

Tswv Ntuj pom wb, nws yuav txiav txim rau wb raws li wb txoj kev ib tug ua tsis ncaj rau ib tug. Peb yeej tsis muaj ib tug yuav hla dhau tsis raug txiav txim ib zaug. Tswv Ntuj yog neeg tus Huab Tais.

Qhov kawg, tus zoo tus phem tib si yuav tsum los cuag Tswv Ntuj tag tus li. Yog peb tsis muab peb qhov xav ua phem tua, mas peb yuav nrog peb qhov phem mus poob hauv lub qhov tuag xwb. Tsis tag li, yus yuav raug txaj muag rau Tswv Ntuj thiab tus yus tsis saib nws.

Tswv Ntuj yeej tsim ib tug poj niam los rau ib tug txiv neej yuav xwb. Nws tsis tsim ob tug poj niam rau ib tug txiv neej yuav. Thiab Tswv Ntuj hais tias tus txiv neej yuav tso nws niam nws txiv tseg, nws yuav mus nrog nws poj niam; ces nkawd ob leeg ua ib lub cev xwb. Ua li mas nkawd tsis yog ob leeg, nkawd koom ua ib lub cev. Yog vim li ntawd mas yam ua Tswv Ntuj muab sib sau los ua ke, neeg yuav tsis txhob muab sib txhem. (MT19:3-7)

Tswv Ntuj yeej sau ob tug niam txiv los nyob ua ke, kom tau tsim ib pab tub ki tawm ntawm nkawd los, kom cov tub ki yuav tau muaj kev sib nyiam sib hlub thiab hwm niam hwm txiv, hwm Ntuj ua neeg tus Huab Tais.

Tswv Ntuj tsis xav kom nkawd sib ncaim thiab coj tus piv txwv tsis zoo rau cov me nyuam taug thiab. Thaum ob tug niam txiv sib nrauj thiab tsis sib hlub hauv nkawd lub neej thiab hauv nkawd pab tub ki, mas yuav ua rau cov me nyuam nco ntsoov rau hauv lawv lub siab lub neej tsis ploj li. Ces ua rau cov me nyuam tsis hwm niam hwm txiv lawm thiab.

Tus sau: LTH. Lauj Vam Thaiv