TXOOV TIM TSWV XIM CEEJ PHEEM NCIG TSHAM HMOOB THIAB CO

Ua ntej yuav txog Suav lub Tsiab Peb Caug, mas tus Txoov Tim Tswv Xim Ceej Pheem tau mus ncig tsham cov haiv neeg tsawg uas nyob toj siab, xws li cov Co thiab cov Hmoob nyob hauv lub zos Huas Vum, nroog Tshiam Xis xeeb Kim Tsawb nyob toob fab naj hauv Suav teb. Xim Ceej Pheem tau hais lus foom hmoov zoo rau cov haiv neeg toj siab yam li sawv daws yog ib tsev neeg. Hauv lub zos Huas Vum muaj toj roob hauv pes zoo nkauj, cov Hmoob hnav tsoos tsho hmoob zoo nkauj zoo saib kawg tos txais Xim Ceej Pheem.  

Qhov uas tus Txoov Tim Tswv Xim Ceej Pheem tau mus tsham xyuas cov Hmoob nyob hauv tej lub zos me me nyob toj siab uas yog lub caij sawv daws noj tsiab, mas tsis yog ib yam ua si, nws yog yam tseem ceeb kawg.

Yav tag los lub xeev Kim Tsawb yog ib lub xeev uas tsoom pej xeem pluag thiab txom nyem tshaj plaws nyob Suav teb, thiab yog thawj lub xeev qhia txog kev daws teeb meem ntawm cov neeg pluag txom nyem. Tsoom pej xeem nyob hauv lub xeev Kim Tsawb muaj tshaj 9 plhom leej. Xyoo 2011 lub xeev Kim Tsawb tau muab siab rau daws dim cov teeb meem neeg pluag thiab txom nyem rais los ua lub xeev khwv tau nyiaj 276,000 plhom USD nyob rau tsaib no. Lub zos Huas Vum yog nyob hauv lub nroog Pij Ciam thiab nyuam qhuav dim ntawm txoj kev pluag txom nyem xyoo 2019.

Lub nroog Pij Ciam yog nyob toj siab tej chaw ntxhab hauv lub xeev Kim Tsawb, uas yav tag los yog lub nroog pluag tshaj nyob Suav teb. Tseem hwv Suav tau muab kev txhawb nqa, ces lub nroog Pij Ciam thiaj pib kho lawv tej dej av ua noj ua haus. Ua kom tej toj roob qhuav rais los ua toj roob ntsuab xwb xiab.  Tsoom pej xeem muab siab rau pib ua lawv tej liaj teb, yug tsiaj thiab txhim kho fab kev ncig tsham.

Tsoom pej xeem tau txais kev cob qhia los ntawm cov neeg txawj ntse, ces lawv txawj sib tw ua noj ua haus. Ua kom neeg txawj hloov thiab tej toj roob hauv pes txawj hloov, ces tsoom pej xeem thiaj dim ntawm lub neej pluag txom nyem los nyob rau lub neej ib nrab lawm. Tus Txoov Tim Tswv Xim Ceej Pheej thiaj qhuas thiab hais tias lub nroog Pij Ciam “yog tus yam ntxwv ntawm cov neeg pluag nyob Suav teb”. Yog ib txoj kev yeej txoj kev pluag loj kawg nkaus, tab txawm tias poob nyob hauv lub caij tus kab mob Covid-19 sib kis, tsis kav sawv daws muab siab rau tiv kev txom nyem.

Tus Txoov Tim Tswv Xim Ceej Pheem ib txwm saib tsoom pej xeem txoj kev pluag txom nyem yog qhov tseem ceeb, nyob hauv nws txoj kev ua hauj lwm kav pej xeem los txwm 8 lub xyoo. Suav teb tau ua kom cov nroog pluag thiab txom nyem tshaj dim ntawm txoj kev pluag txom nyem. Suav txoj kev daws kho cov neeg pluag txom nyem (Absolute Poverty) ua rau tseem hwv Suav hais tib lo lus tias : “Yuav tsis tshuav cov nroog thiab cov neeg pluag raug tso tseg poob qab lawm”.

Yav tag los Suav teb yog ib lub teb chaws uas txom nyem nyob ntiaj teb no thiab txom nyem los ntau tiam. Muaj cov neeg pluag txom nyem coob tshaj 900 plhom leej. Tab sis zim txwv no tseem hwv Suav muaj peev xwm daws kho kev pluag thiab txom nyem nyob hauv lub teb chaws txhua txhua xyoo. Thaum Xim Ceej Pheem sawv los ua nom kav Suav teb, mas nws tau cog lus tias nws yuav ua kom kev pluag txom nyem nyob Suav teb ploj mus nyob hauv xyoo 2020. Nws yuav tsim kom neeg muaj kev vam meej nyob rau lub neej txheej nrab, ua ntej yuav txog hnub nyoog txwm 100 xyoo ntawm txoj cai koom tshaj nyob hauv lub 7 hli xyoo 2021.

Hnub tim 23 lub 11 hlis tsaib no, cov tseem hwv Suav tshaj tawm tias ; cov pej xeem nyob hauv 9 lub nroog uas txom nyem tshaj hauv xeev Kim Tsawb tau dim ntawm kev pluag txom nyem lawm. Txhais tau tias cov zej zog pluag thiab txom nyem tshaj nyob Suav teb tsis muaj lawm.

Cov tseem hwv Suav xam cov neeg pluag txom nyem tshaj (Absolute Poverty), mas yog cov yim neeg uas lawv khwv nyiaj ib xyoos tsis tau txog 2,300 yuan (los yog 10,000 npaj). Yog cov neeg pluag txom nyem tshaj tsoom pej xeem Thaib. Vim tseem hwv Thaib txoj cai hais txog cov neeg pluag, mas yog cov yim neeg uas ib xyoos lawv khwv tsis tau 30,000 npaj.

Hnub tim 11 lub 2 hlis 2021, tseem hwv Suav muaj kev tso tshaj xyam (TV) ua tej yam tshwj xeeb Spring Festival Gala hais txog Suav lub Tsiab Peb Caug, tshaj tawm rau 170 lub teb chaws nyob thoob ntiaj teb tau saib. Yog kev ua yeeb yam thiab tshaj txog Suav tej kab lis kev cai uas siv cov twj txheej tshiab Technology AI+VR naked eye 3D nyob saum sam thiaj thawj zaug, thiab kuj yog thawj zaug tshaj xyam tawm 8K Ultra HD.