UNICEF THUAM KEV TUA NEEG NYOB KOOS NKOS TEB

UNICEF thuam thiab xyav moo txog kev tua neeg tuag 16 leej nyob hauv lub xeev Ituri, nyob Koos Nkos teb sab hnub tuaj. Nyob hauv 16 leej neeg raug tua tuag ntawd, muaj 15 leeg yog me nyuam ntxhais. Qhov UNICEF thuam loj tshaj, mas yog qhov cov neeg phem tua ib co me nyuam yaus tsis paub qab hau dab tsi, ces thov kom sawv daws hwm txoj cai ntawm cov poj niam thiab cov me nyuam. Raws li kev soj ntsuam ntawm lub Leej Haum Kuj (UN), mas muaj kev tua neeg nyob hauv lub zos Moussa uas nyob qaum teb ntawm lub xeev Ituri. 16 tus neeg ntawd yav tag los lawv tau khiav ua thoj nam thiab khiav rov los hauv lawv lub zos, ces lawv raug neeg xuas phom thiab xuas riam tua, ua rau coob leej khiav ntawm lub zos Mus Xas mus rau lwm cov zos uas nyob ib ncig. Txij lub 4 hlis ntuj los txog tam sim no, twb muaj neeg raug tua tuag 300 tawm leej nyob hauv lub xeev Ituri lawm. Tsis tas li ntawd, tseem muaj kev mos deev tej me nyuam ntxhais thiab tua pov tseg li ntawm 100 zaug. Tua cov tsev kawm ntawv thiab cov tsev kho mob nyob hauv Ituri piam sij tas huv si. Ces lub Koom Haum UNICEF thiaj tshaj tias : kev thaj yeeb nyob hauv lub nroog Ituri tab tom puas tsuaj, thov kom lwm cov teb chaws thiab cov tseem hwv Koos Nkos muab siab rau daws cov teeb meem no kom sai, ua ntej cov me nyuam ntxhais yuav raug quab yuam thiab raug tua coob tshaj no. Kev kub ntxhov ntawm tseem hwv cov tub rog thiab cov neeg ntxeev siab, mas pib muaj thaum lub 12 hlis tsaib no los lawm. Nyob hauv lub 3 hlis nrab, mas 2 tog rov sib ntaus sib tua hnyav zuj zus los. Ces thiaj ua rau cov neeg ntxeev siab nyiag tua neeg li hais los no.