YEEJ TSIS XAV KOM IB LUB HNUB QUB PLOJ

Nyob zoo ib tsoom kwv tij phooj ywg !
Hnub no kuv yuav tham txog cov hnub qub nyob saum ntuj, uas thaum ploj ntais lawm, mas txhais tias lub ntuj yuav tsis zoo nkauj cuag li qub, vim tias cov ci ci tsis muaj ntsais lawm puas yog ?
Yog vim li ntawd, mas kuv yuav muab tas txhia haiv neeg li lus uas nyob thoob ntiaj teb no los piv rau tas txhia lub hnub qub uas nyob saum ntuj, tias tej yam ntawd zoo qhia peb txog dab tsi.
Li ntawd mas kwv tij phooj ywg, yog yus muab hom lus Hmoob los piv tias yog ib lub hnub qub kuj tau. Yog tias tsis muaj ib tug tib neeg Hmoob hais tau thiab sau tau lus Hmoob lawm, mas txhais tias haiv neeg Hmoob tej txuj ci yuav ploj zuj zus mus ntag. Vim tias tib neeg tej txuj ci uas Tswv Ntuj foom pub rau, ib txhia haiv neeg tej lus ploj lawm, ces cuag li cov hnub qub uas ci ci nyob saum ntuj tau ploj ib txhia, mas lub ntuj yuav tsaus nti tsis muaj qhov pom kev rau lub ntiaj teb li qub. 
Yog vim li ntawd, mas kom sawv daws saib hauv teb chaws Suav, teb chaws Nyab Laj, teb chaws Los Tsuas thiab teb chaws Thaib tias : “Tsoom Hmoob puas yuav kub siab txuag lus Hmoob kom ciaj sia ntxiv mus li luag lwm haiv neeg ?”
Kwv tij phooj ywg, thov kom sawv daws nco tias txij ntawm xyoo 1953 los, mas Txiv Plig Nyiaj Pov tau kub siab tsim ib phau ntawv me me thiab muab luam tawm ntau txhiab phau los khaws Hmoob tej lus tseg cia. Phau ntawv ntawd muaj lub npe tias : “XYAUM NYEEM NTAWV HMOOB THOOB TEB.”
Tsis tas li ntawd xwb, txij ntawm lub 12 hlis xyoo 1994 los, mas hauv peb lub tshaj xo Zoo Tswv Zov Yaj, peb kuj tau qhia ntawv Hmoob rau cov kwv tij Hmoob kom lawv tau kev kawm thiab sau ntawv Hmoob. Niaj hnub no peb tseem niaj hnub nrhiav kev qhia ntawv Hmoob tsis tseg rau cov zej zos Hmoob.
Li ntawd, mas hauv cov teb chaws uas muaj peb cov kwv tij Hmoob nyob, thiaj muaj ntau txhiab tus Hmoob txawj nyeem thiab sau tau ntawv Hmoob thiab kuj muaj coob leej sau tau ntau phau ntawv Hmoob los cim Hmoob tej txuj ci lawm. Tseem muaj ib txhia Hmoob siv tus ntawv Hmoob no sau ntawv mus fim tsoom kwv tij neej tsa uas nyob rau pej kum teb thiab.
Mas saib nyem no mus lawm yav tom ntej, sawv daws puas yuav ua ntxiv ?
Peb cov tub lis tej dej num hauv lub tshaj xo Zoo Tswv Zov Yaj, peb yeej tso siab lug tias : nyem no mus lawm yav tom ntej, nej sawv daws hauv tej zej zos Hmoob, nej puas yuav muab siab rau qhia ntawv Hmoob rau cov kwv tij neej tsa hauv nej lub zos thiab kom cov me nyuam Hmoob sawv daws txawj ntawv Hmoob. Yog ua tau qhov ntawd, ces Hmoob tej lus thiab tej txuj ci thiaj li yuav ciaj sia ntxiv mus. Hos yog nej tso tseg, nej tsis quav ntsej rau nej tus ntawv Hmoob lawm, mas nej Hmoob lub hnub qub yuav ploj mus.
Peb paub zoo tias yeej muaj ntau hom lus Hmoob nyob rau Suav teb, tiam sis nyob Nyab Laj teb, Los Tsuas teb thiab Thaib teb, nrog rau cov Hmoob uas nyob ntau lub teb chaws rau sab hnub poob tsuas muaj 2 hom lus xwb, yam li lus Hmoob Dawb thiab lus Hmoob Lees, mas saib yuav ua li cas ?
Tej lus Hmoob uas ib nyuag sib txawv li no, Tswv Ntuj foom hmoov zoo rau nej haiv neeg lawm, ces nej yuav tau sib pab txuag mus, kom thooj li rev paj uas muaj ntau tsos nyob saum nej Hmoob lub theej kiab, kom nej lub rooj ntaub rooj ntawv thiaj li zoo nkauj, zoo saib.
Luag lwm haiv neeg tuaj pom nej, tuaj fim nej, luag yuav pom tias nej muaj ntau hom lus sib txawv me ntsis. Tej tsoos tsho kuj sib txawv me ntsis, tsis kav nej kuj sib koom ua tau ib haiv neeg xws li luag, uas muaj ib lub hnub qub ci ci nyob saum ntuj thiab, ces luag yuav pom tias nej tsis yog ib haiv neeg toj siab li yav tag los lawm. Qhov ntawd, yog nej hom lus Hmoob thiab tus ntawv Hmoob.
Kwv tij phooj ywg, yav dhau los muaj phau ntawv qhia lus Hmoob Dawb lawm, tiam sis kuj yuav muaj phau ntawv qhia lus Hmoob Lees thiab. Tsis tas li ntawd, kuj tseem tshuav cov Hmoob uas nyob rau Suav teb, hais ib co lus txawv ntawm ob hom lus Hmoob no lawm, yam li : “Moob Dub, Moob Saus thiab Hmoob Kanao”, mas xyov yuav ua cas haiv neeg Hmoob thiaj li koom siab siv tib tug ntawv tau. Tiam sis qhov tseem ceeb, yog Hmoob nyob thoob ntuj siv tib tug ntawv lawm, ces mam li sau raws li lub suab lus uas yus hais tawm. Qhov no yuav pab tau rau kom haiv neeg Hmoob ua tau ib tug xws li lwm haiv neeg, kom Hmoob lub hnub qub txhob ploj nyob saum ntuj.
Kev qhia ntawv Hmoob rau nej tej me nyuam, rau nej tej zej zos, mas yog ib yam hauj lwm uas tseem ceeb heev. Yav dhau los nej coob leej twb tau ua tej hauj lwm li no los lawm, mas yog ib yam hauj lwm txuag nej haiv neeg Hmoob lub hnub qub ci ci uas yog hom lus Hmoob no ntag !
Peb vam tias txoj hauj lwm no, nej coob leej yuav tsis tso tseg thiab nej yuav ua mus ntxiv, kom Hmoob lub hnub qub ci ntsa iab nyob saum ntuj ib yam li luag lwm haiv cov hnub qub thiab mog !

Tus sau : TP. Txhiaj Foom (2015), Zoo Tswv Zov Yaj