YUAV NROG YUS TSEV NEEG SIB HAUM XEEB

Tswv Ntuj tau tsim neeg kom xws li Tswv Ntuj tus duab, Tswv Ntuj tsim kom muaj poj niam thiab txiv neej. Tswv Ntuj foom hmoov zoo rau nkawd tias : “Neb yuav yug tub yug kiv kom coob”. ( HP 1 : 27-28 ) Kev sib yuav ua txij ua nkawm yog mus raws Tswv Ntuj lub hom phiaj thiab ua kom muaj noob neeg nyob mus tsis paub kawg. Tswv Ntuj hais tias : tus txiv neej yuav tso nws niam nws txiv tseg thiab mus nrog nws tus poj niam nyob, thiab nkawd ob leeg yuav sib koom ua ib tug. Kev tsim txiv neej thiab poj niam los nyob ua ke, yog thawj lub tswv yim uas Tswv Ntuj npaj tseg. Kev sib yuav ua txij ua nkawm thiaj yog kev ua raws Tswv Ntuj lub tswv yim, yog lees  txais txoj hauj lwm ntawm Tswv Ntuj thiab tib neeg ntiaj teb. Thiaj muaj ntawv sau tseg tias : kev sib hlub ntawm cov niam txiv, mas yuav tsum yog tuaj ntawm lub cev nqaij thiab lub siab tuaj. Yuav sib hwm thiab hlub ncaj ncees mus txog hnub tuag. Txoj hauj lwm thiab txoj kev sib raug zoo no, nkawm niam txiv tsim nyog yuav ua sib pub, ib tug yuav coj zoo rau ib tug. Nkawd yuav nco txog qhov zoo ntawm nkawd txoj kev sib yuav, tsis hais tus poj niam los tus txiv neej, thiab yog neeg ntseeg los tsis ntseeg. Kev ua raws txoj kev hlub ua cog tseg no, tsis yog tias yuav sib yuav raws kev cai Kav Tos Liv thiab kom tus poj niam muaj me nyuam ua pov thawj xwb. Qhov loj tshaj ntawd, yog ib txoj kev hlub uas sib hwm thiab sib hlub tiag tiag ua kom yus txoj kev hlub loj zuj zus. Lub Koom Txoos Kav Tos Liv kuj pom zoo txog txoj kev sib nyiam sib hlub ntawm kev ua ib yim neeg. Vim nws yog txoj kev txhawb nqa Tswv Ntuj zaj tswv yim kom neeg huam vam. Tib neeg lub luag hauj lwm ntawm Tswv Ntuj yog fim lub Koom Txoos thiab koom ua thaj txi Ntuj. Ntawm yus tus kheej yog ua kom lub neej ua neeg ntseeg loj hlob thiab tej me tub me nyuam tau txais kev qhuab qhia kom paub txog Tswv Ntuj.

Kev nrog lub Koom Txoos sib fim thiab nrog lwm cov kev teev hawm sib fim, mas yog ib yam zoo ntawm ib tug neeg ntseeg. Vim yus nrog lwm cov neeg muaj kev ntseeg sib txawv sib fim, mas tau kev sib hloov tswv yim thiab paub tej yam uas yus tsis tau paub dua. Kev sib fim ntawd ua kom yus nrog lwm cov neeg sib haum xeeb thiab muaj kev sib pab, sib txhawb nqa. Ib tug neeg ntseeg ua ntej yuav mus nrog lwm cov neeg sib fim los yog nrog lub Koom Txoos sib fim tau, mas yuav tsum xub fim yus tsev neeg kom muaj kev sib haum xeeb ruaj khov. Vim kev fim yus tsev neeg yog thawj kauj ruam thiab zoo yam li ib lub koom txoos nyob hauv yus tsev ntag. Yus tsev neeg yog qhov tseem ceeb tshaj plaws ua ntej hlo thiab yog lub zog yuav txhawb nqa yus kom mus nrog lwm tus neeg thiab lwm lub Koom Txoos sib fim tau zoo. Yus pib ntawm yus tsev neeg me me, uas muaj txij muaj nkawm thiab muaj me tub me nyuam. Kev sib haum xeeb hauv lub cuab yim neeg, yog thawj yam uas Tswv Ntuj tau npaj tseg cia thiab Tswv Ntuj nyiam. Yog yus muaj kev sib haum xeeb nyob hauv yus yim neeg lawm, mas yus kuj nrog lub Koom Txoos thiab Tswv Ntuj sib haum xeeb tau. Yus tus kheej yuav tsum muaj kev nyiam kev hlub, kev cia siab thiab kev ntseeg ruaj khov txog Tswv Ntuj. Yus ua lub neej raws Tswv Ntuj cov lus qhia thiab lub Koom Txoos cov lus qhia. Ua kom yus lub neej sib hlub yog qhov pov thawj nyob hauv lub neej, coj lub neej ua txij ua nkawm nyob hauv txoj kev sib nyiam sib hlub, siab loj siab dav, ncaj ncees thiab pab luag tej tsis xam khib. Yus yuav muaj txoj kev xav zoo nyob hauv yus nruab siab thiab nquag mus teev Ntuj, yaum lwm tus neeg kom mus teev Ntuj thiab koom ua cov hauj lwm nyob hauv tsev teev Ntuj. Yus yim neeg yuav tsum nquag hais zaj Saw Mab Liab los pab yus, kom yus txawj ua cov hauj lwm zoo pab luag tej thiab nrog luag tej sib fim, kom yus txoj kev hlub nyob hauv yus yim neej ruaj khov mus li. Tas txhua yam no yog kev sib fim thiab kev sib haum xeeb nyob hauv yus lub cuab yim neej.