CAIJ TOS HUAB TAIS YOG LUB CAIJ RAU PEB TIG LOS YUAV SIAB TSHIAB

Nyob hauv lis piam 2 Caij Tos Huab Tais, Vaj Qhia Fas Ntshis Kus caw sawv daws kom tig los yuav lub siab tshiab nyob huav Caij Tos Huab Tais no.

Ntawv Moo Zoo hauv hnub no mas piav txog Tswv Ntuj lub tswv yim xa Zam Ntxuav Plig los npaj neeg lub siab kom ntshiab tos txais tus Huab Tais yuav tuaj. Zam Ntxuav Plig tshaj kom sawv daws hloov siab tshiab los nyob hauv Tswv Ntuj txoj kev.

Vaj Qhia hais tias ua ntej tshaj mas peb tsum paub lo lus ‘hloov siab tshiab’ tias yog dab tsi tso. Lo no yog kom peb pauv txoj kev taug tshiab, thiab pauv peb txoj kev xav tshiab.

“Nyob hauv neeg kev ncaj ncees thiab txoj sia hauv sab ntsuj plig mas kev hloov siab tshiab yog kev pauv ntxeev yus hauv qhov phem los ua qhov zoo, hauv kev txhaum los nyiam Tswv Ntuj.”

Vaj Qhia hais tias Zam kab ke Ntxuav yog lub cim rau qhov muag pom tias tus neeg ntawd txaus siab tig los hloov siab tshiab raws li Zam cov lus tshaj. Kab ke no yuav tsis muaj qab hau yog tus neeg ntawd tsis txaus siab tig los yuav siab tshiab tiag thiab tsis hloov nws kev ua neej.

“Tus neeg hloov siab tshiab tsum tu siab rau nws txoj kev txhaum, nws xav daws nws txoj sia kom dim hauv txoj saw hlau txhaum khi nws cia tiag tiag, thiab nws yeem khiav kom deb ntawm kev txhaum.” Vaj Qhia ntuas sawv daws, “Txhob lees txais txhua yam muaj feem xyuam nrog kev ua txhaum; tsis hais ntiaj teb kev xav, kev noj qab haus tsau, kev nyob zoo sov cev, kev muaj noj muaj haus.”

Vaj Qhia nthuav tias yam tib ib tshaj plaws hauv kev hloov siab tshiab yog tso tseg kev ua txhaum thiab tso kev ntshaw lub ntiaj teb. Yam ob yog nrhiav Tswv Ntuj thiab Ntuj lub Ceeb Tsheej.

“Kev tso ntiaj teb tseg thiab tso kev noj qab haus tsau tseg tsis yog yuav ua rau peb ntsib qhov xaus hauv txoj sia, tiam sis yog kom peb ras ntsoov txog Tswv Ntuj lub Ceeb Tsheej thiab khaub zig Tswv Ntuj.”

Vaj Qhia lees tias yam no yog ib yam tsis yooj yim rau tib neeg, vim tib neeg muaj kev sib txheeb nrog kev txhaum. Tej zaug mas lub zog txhawb peb mus cuag Tswv Ntuj tsawg dhau thiab zoo tam li Tswv Ntuj tsis quav ntsej txog peb.

Yog vim li no mas peb thiaj poob rau txoj kev ntxias yooj yim heev thiab thiaj ua rau peb hloov siab tshiab los nrhiav Tswv Ntuj tsis tau, peb thiaj yeem ua lub neej nyob hauv cov pas hawv zom peb.

“Thaum zoo li no mas peb yuav ua dab tsi tau?” Vaj Qhia muaj lus nug “Peb tsum nco ntsoov tias kev hloov siab tshiab yog lub txiaj ntsim, li ntawd peb thiaj tsum nquag thov Tswv Ntuj kom muab rau peb.”

Tshwj xeeb tshab mas yog peb tsum qhib siab tiag tiag los txais Tswv Ntuj tuaj nyob hauv peb, Vaj Qhia xaus li no.