COV HAUJ LWM YOG YAM TSEEM CEEB HAUV KEV LOJ HLOB NYOB HAUV KEV NTSHIAB HUV

Nyob hauv Vaj Qhia Fas Ntshis Kus cov lus qhuab qhia tsoom ntseeg hauv Hnub Plaub hauv lis piam 1 caij Nyob Nruab Xyoos yog nthuav Leej Ntshiab Yos Xes lub neej ua hauj lwm thiab lub tsim ntawm cov neeg ua dag zog tias muaj feem pab kom neeg vam meej thiab loj hlob nyob hauv kev ntshiab huv.

Nyob hauv Mas Tais Ntawv Moo Zoo thiab Mas Kos Ntawv Moo Zoo sau tias Yos Xes yog ‘kws ntoo’. Vaj Qhia hais tias tus neeg ua kws ntoo yog tus neeg ua cov hauj lwm hnyav, yog cov neeg siv lub dag lub zog ntau tab sis tau nqe zog tsawg.

Thaum peb ntsia Leej Ntshiab Yos Xes lub neej, peb yuav xav txog cov kwv tij ua hauj lwm hnyav nyob hauv kev raug quab yuam los raug yuam ua hauj lwm, peb yuav xav txog cov kwv tij poob hauj lwm thiab lawv tsev neeg nyob hauv lub caij tas ntiaj teb ntsib xwv txheej kab mob sib kis zoo li no.

Vaj Qhia hais ntxiv tias kev ua hauj lwm yog ib feem nyob hauv neeg lub neeg thiab hauv txoj kev ntxuav neeg kom ntshiab.

“Hauj lwm tsis yog kev nrhiav yug peb txoj sia xwb, hauj lwm tseem yog yam peb tau tshaj rau lwm tus tias peb yog ib tus neeg muaj qab hau thiab hauj lwm yog ib zaj kev kawm kom neeg loj hlob nyob hauv sab ntsuj plig thiab.”

Tiam sis muaj ib yam tsis zoo ua rau sawv daws tu siab kawg nkaus, yam ntawd yog cov tub zog poob hauv neeg txoj kev tsis coj ncaj, neeg kev tsis sib hwm. Li ntawd, puas yuav zoo dua yog niaj hnub peb yuav rov nug peb tias kuv txoj hauj lwm puas cuam tshuam rau leej twg thiab muaj txiaj ntsim rau kuv li cas.