COV HLUAS YUAV TSUM UA TIM KHAWV TXOG KEV VAM KHOM

Hnub chiv tim 5 lus 4 hlis no, Vaj Qhia tau ua Thaj Txi Ntuj thiab thov Ntuj rau cov neeg mob thiab rau lawv tsev neeg sawv daws, thiab thov Ntuj rau cov neeg saib xyuas cov neeg mob ntawd.
Tom qab Vaj Qhia ua Thaj Txi Ntuj hauv Hnub Chiv Nqaum Nplooj tas, Vaj Qhia hais rau ib tsoom ntseeg uas koom Thaj Txi Ntuj nyob hauv lawv cov tsev tias “Kuv lub tswv yim tau nrog cov tub hluas ntxhais hluas hauv qab ntuj no tawm mus lawm.”
Tos Vaj Qhia hais li no, vim tsaib no hnub tim 5 lub hli no yog hnub ua koob tsheej cov tub hluas ntxhais hluas thoob qab ntuj nyob rau teb chaws Npas Nas Mas thiab yuav ua ntxiv rau lub xyoo 2022 tom ntej no. Nyob rau lub sij hawm peb tos ‘Hnub Cov Hluas Thoob Qab Ntuj’ no, mas Vaj Qhia thiaj thov kom cov hluas sawv daws cog txoj kev vam khom nyob hauv lawv thiab ua tim khawv txog kev vam khom, kev hlub lwm tus thiab kev sib haum xeeb.
Vaj Qhia hais ntxiv tias hnub tim 6 lub hli no yog hnub lub Leej Haum Kuj tsa ua ‘Hnub Sib Tw Ua Si’, tiam sis nyob rau lub zim txwv zoo li no, mas thiaj raug kaw tas. Txawm li ntawd los, peb yuav pom lub txiv zoo ntawm kev sib tw ua si no nyob hauv kev tawm tsam, kev koom tes sib pab thiab kev sib raug zoo ua kwv ua  tij. Yog li Vaj Qhia thiaj xav kom qhib kev sib tw ua si no ntxiv mus.
Vaj Qhia xaus nws cov lus tias peb cov ntseeg yuav tsum muaj txoj kev ntseeg tiag nyob hauv lub Lis Piam Ntshiab uas Huab Tais Yes Xus raug kev txom nyem, tuag thiab sawv rov qab los. Tsis tas li, Vaj Qhia thov sawv daws kom sib sau thov Ntuj nyob hauv tsev.
Thov kom peb thov Leej Ntuj Plig nqes los nyob ib ncig cov muaj mob thiab lawv tsev neeg thiab cov ua hauj lwm saib xyuas lawv. Thov peb thov Ntuj rau cov tau tso ntiaj teb no tseg nyob hauv Caij Hla no. Lawv sawv daws nyob hauv peb siab, nyob hauv peb lub tswv yim thiab nyob hauv peb kev thov Ntuj.
Kawg no, Vaj Qhia thov niam Mab Liab kom nrog peb taug txoj kev txom nyem no thiab txhawb peb txoj kev vam khom.
Vam Txog : Vaticannews.va/en
Tus txhais : Muas Lauj, Zoo Tswv Zov Yaj