COV LAUS LUB NEEJ NTUAS KOM PEB TXHOB TSO KEV NTSEEG POV TSEG

Vaj Qhia Fas Ntshis Kus muab Yob lub neej los nthuav rau cov ntseeg tau kawm txog kev ua pov thawj txog Tswv Ntuj tus muaj lub siab muag.

Hnub tim 18 lub 5 hlis 2022 no Vaj Qhia Fas Ntshis Kus rov qab qhia txog cov laus lub txiaj ntsim raws Tswv Ntuj Lo Lus, ntu no yog cov lus nyob hauv phau ntawv Yob. Vaj Qhia nthuav tias nyob hauv Yob lub neej raug txom nyem mas Yob tsis tso nws kev ntseeg pov tseg, ces nws thiaj to taub tias Tswv Ntuj cawm nws nyob hauv kev khuv leej thiab kev nyiam, txawm tias thaum nws raug xwm phem mas zoo li Tswv Ntuj tsis quav ntsej nws.

“Peb pom tias Yob ua pov thawj txog txoj kev ntseeg Tswv Ntuj, nws tsis zwm rau dab phem kev ntxias mus txog hnub Tswv Ntuj teb nws thiab nthuav Tswv Ntuj lub ntsej muag rau nws pom.”

Thaum Yob raug txom nyem, nws tsis yeem ua raws cov phooj ywg li lus hais kom nws tsawm ntuj. Law xav tias lawv paub Tswv Ntuj thiab to taub kev txom nyem zoo, lawv tuaj hais lus nplij Yob lub siab kom ntaug, tab sis tseeb tiag mas lawv cov lus yog ib co lus txiav tuaj ntawm lawv lub tswv yim xwb. Yob thiaj tsis yeem ua raws li lawv hais, Yob tso siab rau Tswv Ntuj qhov ncaj.

Vaj Qhia nthuav Yob lub neej tias yog tej xwm tshwm nyob hauv peb txoj sia tiag, tsis hais hauv peb ntiag tug, hauv peb lub cuab, hauv tsoom neeg. Peb paub zoo txog cov neeg ua zoo lawv kev raug txom nyem xws li lawv tsis tau txais qhov ncaj thiab xws li lawv yuav ris tsis tau lawm tiag, tab sis lawv tso siab rau Tswv Ntuj lo lus cog cia xws li Yob tau ua piv txwv. Tshwj xeeb mas yog hauv cov ua niam ua txiv uas lawv cov me nyuam yug los tsis zoo xws li luag lwm tus, cov neeg muaj mob kho tsis tau, cov neeg ua hauj lwm cawm lawv tsev neeg.

Hauv phau ntawv Yob qhia peb tias Tswv Ntuj mloog Yob yws txog nws kev txom nyem. Li ntawd, mas kev thov Ntuj thiaj tsum zoo xws li Yob tau ua; yog hais qhov tuaj raug peb rau Tswv Ntuj xws li tus me nyuam qhia rau leej txiv vim tus me nyuam paub zoo tias leej txiv nkag siab nws zoo.

Vaj Qhia ntuas tias yam qhia peb txog Yob txoj kev ntseeg khov kho mas yog nws thov Ntuj tsis tseg txog Tswv Ntuj qhov ncaj, Yob hais tias “Thaud, kuv paub koj vim kuv hnov luag tej hais xwb. Tab sis nyem no kuv paub koj vim kuv tau pom koj lawm.” (Yob 42: 5)

Vaj Qhia hais ntxiv tias “Lo lus zeem tseeb no yog lo lus txaus ntseeg yog tawm hauv cov neeg laus, cov neeg muaj lub zog me thiab plam nws lub neej lub ncauj los. Cov laus tau ua pov thawj txog tej yam nws tau ntsib tau pom.”

Cov laus nrhiav tau kev zeem tseeb tias lawv hloov lawv kev tu siab ua kev tos nrhw Tswv Ntuj lo lus cog cia. Yog li mas cov laus thiaj muaj cuab kav qhia peb kom koom nrog Huab Tais Yes Xus tus raug ntsia nyob saum Ntoo Cuam, nws cev nws txoj sia rau Leej Txiv Tswv Ntuj txhais tes.