COV LAUS LUB NEEJ UA POV THAWJ YOG KOOB HMOOV RAU COV HLUAS

Vaj Qhia Fas Ntshis Kus ntuas cov hluas sawv daws kom hla lub hav kem phaum neeg mus txais cov phaum laus lub neej ua pov thawj.

Hnub Plaub lub lis piam no mas Vaj Qhia Fas Ntshis Kus tau twm txog tus yaj saub Das Nias zaj npau suav raws li nyob hauv phau ntawv Das Nias tias ‘Kuv ntsia, kuv txawm pom muaj ib co theej kiab txawb ntawd, thiab muaj ib tug neeg laus los zaum hauv. Nws cov ris tsho dawb cuag daus, nws cov plaub hau huv cuag plaub yaj. Nws lub theej kiab yog nplaim taws, muaj ib co log hluav taws. Muaj ib tug dej yog hluav taws txhawv ntws lug ntawm nws xub ntiag los. Txhiab vam leej tsob hwb nws. Tas txhiab vam leej puav leej sawv ntsug nyob ntawm nws xub ntiag. Nws qhib lub rooj txiav txim, tej ntawv twb nthvauav tas.’ (DN 7: 9-10)

Ces Vaj Qhia hais tias Das Nias zaj npau suav no mas peb hu tias ‘Thes Os Phas Nis’ txhais tias ‘Tswv Ntuj tawm tuaj rau neeg pom’, yog ib zaj hais txog kev sib fim ntawm cov laus thiab cov hluas.

Nyob hauv Das Nias zaj npau suav mas pom tias tus neeg laus ntawd muaj hwj chim, muaj zog, nto moo kawg li. Tus neeg laus no cov plaub hau dawb cuag daus mas yog lub cim qhia tias nws ib txwm nyob tau ntev niaj tas xyoo los lawm. Yog li mas Vaj Qhia thiaj nthuav tias Tswv Ntuj tus duab yog neeg laus plaub hau dawb paug no yog tus duab tsom kom peb pom tias Tswv Ntuj muaj tsim thiab lub siab mos. Tswv Ntuj nyob hauv tiag neeg thaud thiab tiam neeg tshiab no, vim tias Tswv Ntuj ib txwm nyob mus li. Zoo xws tib yam, ntiaj teb neeg yuav tau pom tias cov phaum laus thiab phaum hluav mas lawv tsum nrhiav kev sib fim thiab sib hloov swm txheej thiab kev kub siab.

“Cov laus yuav tau muab lawv lub neej ua pov thawj no cia ua koob hmoov rau cov me nyuam.” Vaj Qhia ntuas cov laus, thiab hais rau lawv tias cov neeg laus mas lawv muaj txoj kev ua pov thawj rau cov me nyuam.

Vim li no mas Vaj Qhia thiaj tsis pom zoo cia cais cov laus tsis pub nrog cov hluas nyob ua ke. Thiab Vaj Qhia xav kom cov yog niam yog txiv mas lawv yuav tau tso tej me nyuam mus nrog cov laus sib fim, txawm tias cov laus lub neej tab tom nyob ze kev tuag lub rooj vag, kom lawv tau pub ‘kev thoob tsib nyob hauv txoj kev tuag’ rau cov me nyuam vim tias kev tuag yog ib txoj kev tsis yooj yim tab sis yog lub sij hawm xaus lub neej tsis paub meej, thiab yog lub sij hawm pib dua lub neej tshiab uas yuav tsis muaj kev tuag ntxiv.